ტრამპის თქმით, ირანი "ყველაფერზე დათანხმდა" და მათ გამდიდრებულ ურანს აშშ-ში შეიტანენ, ირანში კი ამბობენ, რომ ურანს არსად გაიტანენ - ბოლო ცნობები ახლო აღმოსავლეთიდან
აშშ-ის პრეზიდენტის დონალდ ტრამპის განცხადებით, ირანი "ყველაფერზე დათანხმდა“, მათ შორის გამდიდრებული ურანის ქვეყნიდან გატანაზე.
- CBS-თან სატელეფონო ინტერვიუში ტრამპმა აღნიშნა, რომ მასალის გატანა არ მოიცავს ამერიკელი სახმელეთო ჯარების გამოყენებას და დასძინა, რომ აშშ გამდიდრებულ ურანს „ირანელებთან ერთად მიიღებს“.
"ჩავალთ, მათთან ერთად მივიღებთ მას და შემდეგ წავიღებთ. გვექნება შეთანხმება და ბრძოლის საჭიროება არ იქნება, როდესაც შეთანხმება იქნება“, - აღნიშნა ტრამპმა.
მისი თქმით, ამის შემდეგ ურანს შეერთებულ შტატებში შეიტანენ.
ტრამპის აღნიშნული განცხადების საპასუხოდ ირანში თქვეს, რომ ქვეყნის გამდიდრებული ურანის მარაგს არსად გადაიტანენ.
"ირანის გამდიდრებულ ურანს არსად არ გადაიტანენ“, - განაცხადა ირანის საგარეო საქმეთა სამინისტროს პრესსპიკერმა ესმაილ ბაგაიმ.
ამასთან, Reuters -ის მიერ გავრცელებული ცნობის თანახმად, რაც ირანელი მაღალჩინოსნის განცხადებას ეყრდნობა, ჰორმუზის სრუტე უკვე ყველა სამოქალაქო ხომალდისთვის არის ღია, თუმცა თავად ცურვის პროცესი ირანის “ისლამური რევოლუციის გუშაგთა კორპუსთან“ (IRGC) უნდა იყოს კოორდინირებული. ამავე ინფორმაციით სამშვიდობო გარიგების “განუყოფელ“ ნაწილს ირანული აქტივების განბლოკვაც წარმოადგენს.