"ხალხს თქვენი ეშინია... ადამიანები მათხოვრულად ცხოვრობენ“ - რუსი ინფლუენსერის სკანდალური მიმართვა პუტინს, რომელსაც 23 მილიონზე მეტი ნახვა აქვს: მას კრემლში უპასუხეს

ცნობილი რუსი ბლოგერის, ვიქტორია ბონიას მიმართვამ ვლადიმერ პუტინისადმი ინტერნეტსივრცე დაიპყრო. მიუხედავად იმისა, რომ ბონია წლებია მონაკოში ცხოვრობს, მისმა ემოციურმა სიტყვებმა მილიონობით ადამიანის გულამდე მიაღწია.

• კონკრეტულად რა თქვა ბონიამ?

ვიქტორია ბონია თავის მიმართვაში რამდენიმე მწვავე და სენსიტიურ თემას შეეხო, რამაც საზოგადოების ყველაზე დაუცველ ფენებში პოვა გამოძახილი:

ბონიამ პირდაპირ უთხრა რუსეთის პრეზიდენტს: "ვლადიმერ ვლადიმეროვიჩ, ხალხს თქვენი ეშინია“.

მან აღნიშნა, რომ ქვეყანაში ადამიანები ვერ ბედავენ პრობლემებზე საუბარს, რადგან დასჯის ეშინიათ. ბლოგერმა ხაზი გაუსვა, რომ პრეზიდენტამდე რეალური ინფორმაცია არ მიდის. მისი თქმით, ჩინოვნიკები მას მხოლოდ "ლამაზ სურათს“ უჩვენებენ, სინამდვილეში კი ქვეყანაში ბევრი რამ ინგრევა.

• ასევე ისაუბრა პენსიონერებზე, რომლებიც სიღარიბეში ცხოვრობენ და დედებზე, რომლებსაც შვილების გამოსაკვებად ელემენტარული სახსრები არ გააჩნიათ. "ჩვენ გვაქვს უმდიდრესი ქვეყანა, მაგრამ ხალხი მათხოვრულად ცხოვრობს“, - განაცხადა ბონიამ.

ბონიამ გამოიყენა კლასიკური რიტორიკა - მან პუტინს უწოდა ძლიერი ლიდერი, რომელსაც გარემოცვა ღალატობს. მოუწოდა პრეზიდენტს, "გაახილოს თვალები“ იმ უწესრიგობაზე, რაც რეგიონებში ხდება.

23 მილიონი ნახვა და კრემლის რეაქცია

ვიდეომ ინსტაგრამზე 23 მილიონზე მეტი ნახვა დააგროვა. ამის შემდეგ რუსეთში მიმდინარე მოვლენებზე კრიტიკულად სხვა მილიონიანი აუდიტორიის მქონე ინფლუენსერებიც ალაპარაკდნენ, მათ შორის იდა გალიჩი და კატია გორდონი.

• რეაქციამ არც კრემლის მხრიდან დააყოვნა. პუტინის პრესმდივანმა, დმიტრი პესკოვმა განაცხადა, რომ ბონიას მიერ წამოჭრილი საკითხები "რეზონანსულია“ და მათზე მუშაობა მიმდინარეობს. თავად ბონიამ კი ცრემლიანი თვალებით გადაუხადა მადლობა პრეზიდენტს ყურადღებისთვის და აღნიშნა, რომ ეს მისი "რუსული სულის“ ხმა იყო.

ფენომენი: რატომ ენდობიან "ინსტა-დივას“?

ერთი შეხედვით, ეს პარადოქსია. ბონია მონაკოში ფუფუნებაში ცხოვრობს. თუმცა, ფსიქოლოგები განმარტავენ, რომ სწორედ ეს ხდის მას მომხიბვლელს:

1. ბონია შეიძლება არ იყოს პოლიტიკურად კომპეტენტური, მაგრამ ის საუბრობს ემოციურად, რაც ხალხს გულწრფელობის განცდას უჩენს.

2. ის წერს ვიდეოებს ევერესტიდან, მაგრამ პარალელურად ტირის და წუხს ჯანმრთელობაზე. ის ხალხს აჩვენებს, რომ შესაძლებელია გქონდეს მილიონები და მაინც გტკიოდეს სამშობლოს ბედი.

3. ფსიქოლოგიურად, ეს არის "კომპენსატორული კონტროლის“ თეორია. ადამიანებს სჭირდებათ რწმენა, რომ სადღაც მაღლა არსებობს ფიგურა, რომელიც ყველაფერს გამოასწორებს, თუკი სიმართლეს გაიგებს.

კონსპირაცია და "მხსნელის“ როლი

ბონია ირგებს "მხსნელის“ არქეტიპს. საზოგადოებას კი ხშირად ის კი არ უყვარს, ვინც ყველაზე ჭკვიანია, არამედ ის, ვინც ემოციურად ჩართულია.

ვიქტორია ბონიასადმი სიმპათია უფრო მეტს ამბობს საზოგადოებაზე, ვიდრე თავად მასზე. ხალხს სჭირდება ემოციური კავშირი და იმედი, რომ მათ ხმას ვიღაც მიიტანს "ზემოთ“. ბონია კი ამ როლს იდეალურად ასრულებს – მონაკოდან, ცრემლიანი თვალებითა და "რუსული სულით“.