"შავი წვიმა", შავ ზღვაში ჩაღვრილი ნავთობი და ასობით მოწამლული ცხოველი - ტუაფსეში მასშტაბური ეკოლოგიური კატასტროფაა
ტუაფსეში, სოჭიდან ჩრდილო-დასავლეთით, დაახლოებით 120 კილომეტრში. ვითარება კრიტიკულია. მასშტაბური ხანძრისა და ნავთობის დაღვრის შედეგად, ქალაქი და მისი მიმდებარე აკვატორია ბოლო ათწლეულის უდიდესი ეკოლოგიური კატასტროფის წინაშე აღმოჩნდა. "შავი წვიმა", მოწამლული ცხოველები და ზღვაში გავრცელებული ნავთობის ლაქები - ასეთია 2026 წლის აპრილის ბოლოს რეალობა კრასნოდარის მხარეში.
- 16 და 20 აპრილს განხორციელებული დრონების შეტევის შემდეგ, ტუაფსეს საზღვაო ტერმინალზე გაჩენილი ძლიერი ხანძრის ჩაქრობა მხოლოდ ხუთი დღის შემდეგ მოხერხდა. თუმცა, ჰაერში ბენზოლის, ქსილოლისა და ჭვარტლის ნორმამ დასაშვებ ზღვარს სამჯერ გადააჭარბა.
ადგილობრივი მოსახლეობა შოკისმომგვრელი მოვლენის მოწმე გახდა: ქალაქში "შავი წვიმა" წამოვიდა. ატმოსფეროში დაგროვილი წვის პროდუქტები ნალექთან ერთად ჩამოირეცხა, რამაც ყველაფერი - ავტომობილები, შენობები და მცენარეები - ნავთობის თხელი ფენით დაფარა.
ცხოველები საფრთხეში
განსაკუთრებით მძიმე მდგომარეობაში აღმოჩნდნენ ქუჩის ცხოველები და ფრინველები. ასობით ძაღლი და კატა მოწამვლის ნიშნებითაა, მათი ბეწვი კი ნავთობითაა გაჟღენთილი. მოხალისეები საკუთარი ძალებით ცდილობენ მათ გადარჩენას:
"ცხოველები საშინელ მდგომარეობაში არიან. მათ სჭირდებათ სპეციალური დამუშავება. რესურსები კატასტროფულად არ გვყოფნის", - აცხადებენ ცხოველთა დამცველები.
შავი ზღვა და საფრთხე ტურისტული სეზონისთვის
ნავთობპროდუქტების დაღვრამ შავ ზღვაში 10 000 კვადრატულ მეტრზე მეტი ფართობი მოიცვა. მიუხედავად იმისა, რომ დამცავი ბარიერები დამონტაჟდა, ძლიერმა წვიმებმა ნავთობი მაინც გაიტანა ღია ზღვაში. ექსპერტების განცხადებით, ეს არის რეგიონის ყველაზე მასშტაბური ეკოლოგიური უბედურება, რომელიც 2024 წლის ტანკერების კატასტროფასაც კი აღემატება.
სპეციალისტების პროგნოზით, ამ კატასტროფის შედეგების ლიკვიდაციას წლები დასჭირდება. თუ სანაპირო ზოლის სასწრაფო გაწმენდა არ დაიწყება, ზღვის მიერ "გადამალული" ნავთობი ყოველი შტორმის დროს კვლავ ნაპირზე დაბრუნდება და საფრთხეს შეუქმნის როგორც მოსახლეობას, ისე დამსვენებლებს.