ინდოელი მილიარდერი კოლუმბიას "ესკობარის ბეჰემოთების" გადარჩენას და ინდოეთში გადაყვანას სთავაზობს - როგორ აპირებს ანანტ ამბანი მათზე ზრუნვას
ინდოელი მილიარდერის, მუკეშ ამბანის ვაჟმა, ანანტ ამბანიმ კოლუმბიას პაბლო ესკობარის მემკვიდრეობის, ბეჰემოთების პრობლემის გადაჭრაში დახმარება შესთავაზა. ცნობილ ნარკობარონს, ესკობარს, საკუთარ რანჩოში ეგზოტიკური ცხოველები, მათ შორის ბეჰემოთებიც ჰყავდა.
მისი გარდაცვალების შემდეგ, ცხოველები ბუნებაში დარჩნენ და უკონტროლოდ გამრავლდნენ.
- ადგილობრივები ამ ბეჰემოთებს ხშირად "კოკაინის ბეჰემოთებს“ უწოდებენ. მათი რაოდენობა წლების განმავლობაში გაიზარდა, რის გამოც კოლუმბიის ხელისუფლებამ სხვადასხვა მეთოდს მიმართა, მათ შორის კასტრაციასაც, თუმცა პრობლემის სრულად მოგვარება ვერ მოხერხდა. ოფიციალური გეგმის მიხედვით, დაახლოებით 80 ბეჰემოთის დაჭერა ან ლიკვიდაცია განიხილება.
ამ ფონზე ანანტ ამბანი აცხადებს, რომ მზად არის ცხოველები საკუთარ ზოოპარკში გადაიყვანოს.
მისი კერძო ზოოპარკი, ვანტარა, ინდოეთის გუჯარათის შტატში მდებარეობს. ორგანიზაციის წარმომადგენლების თქმით, მათი მიზანი ყველა ცოცხალი არსების დაცვაა.
თუმცა, ვანტარა კრიტიკის საგანიც გახდა. ველური ბუნების დამცველები აცხადებენ, რომ ზოგიერთი ცხოველისთვის რეგიონი ზედმეტად ცხელი და მშრალია, რაც მათ ბუნებრივ პირობებს არ შეესაბამება.
ამ ეტაპზე კოლუმბიის მთავრობას ბეჰემოთების შესაძლო გადაყვანაზე ოფიციალური გადაწყვეტილება არ მიუღია.
კოლუმბიელი ეკოლოგების შეფასებით, ბეჰემოთები ადგილობრივ ეკოსისტემაზე სერიოზულ გავლენას ახდენენ. განსაკუთრებით დაზარალდნენ მაგდალენას მდინარის სანაპიროზე მცხოვრები მეთევზეების თემები. მათი თქმით, ბეჰემოთები ხშირად საფრთხეს უქმნიან ადამიანებსაც - ზრდასრული მამრის წონა სამ ტონამდე აღწევს.