ვენეციის ბიენალეს სკანდალი - გადადგა ბიენალეს ჟიური: რა გახდა ამის მიზეზი?
ხელოვნების საერთაშორისო გამოფენის ვენეციის ბიენალეს ჟიურის თავმჯდომარე და წევრები ღონისძიების გახსნამდე 9 დღით ადრე გადადგნენ, - ინფორმაციას BBC-ი ავრცელებს.
ბიენალეს ოფიციალურ ვებგვერდზე გამოქვეყნებულ პრესრელიზში გადადგომის მიზეზი დასახელებული არ არის.
თუმცა მიზეზებზე მსჯელობა გარკვეული ფაქტების გათვალისწინებით შეიძლება. მაგალითად:
- ჟიურის წევრებმა რამდენიმე დღის წინ განაცხადეს, რომ ჯილდოებზე წარსადგენად არ განიხილავდნენ ხელოვანებს იმ ქვეყნებიდან, რომელთა ლიდერებსაც საერთაშორისო სისხლის სამართლის სასამართლო კაცობრიობის წინააღმდეგ ჩადენილ დანაშაულებში ადანაშაულებს. ეს კი კონკურსიდან რუსეთისა და ისრაელის წარმომადგენლების ჩამოშორებას ნიშნავს.
როგორც ცნობილია, საერთაშორისო სისხლის სამართლის სასამართლოს ვლადიმერ პუტინისა და ბენიამინ ნეთანიაჰუს დაპატიმრების ორდერები აქვს გაცემული.
ვენეციის ბიენალე კრიტიკის ქარცეცხლში მოექცა მას შემდეგ, რაც ორგანიზატორებმა რუსეთს ღონისძიებაზე პავილიონის ხელახლა გახსნის უფლება მისცეს.
ევროკომისიამ განაცხადა, რომ ბიენალეს წერილი გაუგზავნა, რომლითაც აცნობა 2 მილიონი ევროს ოდენობის გრანტის შეწყვეტის ან შეჩერების განზრახვის შესახებ, მას შემდეგ, რაც მათ მოსკოვის მონაწილეობის უფლება მისცეს.