"ირანში სამხედრო მოქმედებები დასრულებულია" - ცნობა დონალდ ტრამპის ადმინისტრაციამ აშშ-ის კონგრესს გაუგზავნა
დონალდ ტრამპის ადმინისტრაციამ აშშ-ის კონგრესს აცნობა, რომ ირანში სამხედრო მოქმედებები დასრულებულია, - ამის შესახებ ინფორმაციას Associated Press-ი ავრცელებს.
- თეთრმა სახლმა აშშ-ის კონგრესის ხელმძღვანელობას ოფიციალურად აცნობა, რომ აპრილის დასაწყისში გამოცხადებული ცეცხლის შეწყვეტის შეთანხმების გამო ირანის წინააღმდეგ ომი დასრულებულია.
„სამხედრო მოქმედებები, რომელიც 2026 წლის 28 თებერვალს დაიწყო, დასრულებულია“, - ნათქვამია აშშ-ის პრეზიდენტის, დონალდ ტრამპის მიერ წარმომადგენელთა პალატის სპიკერ მაიკ ჯონსონისადმი გაგზავნილ წერილში.
აშშ-ის პრეზიდენტი წერილში აღნიშნავს, რომ „2026 წლის 7 აპრილის შემდეგ აშშ-ისა და ირანის სამხედრო ძალებს ერთმანეთის წინააღმდეგ ცეცხლი არ გაუცვლიათ“.
როგორც გამოცემა წერს, ტრამპი „ფაქტობრივად გვერდს უვლის“ 1973 წლის კანონით დადგენილ მოთხოვნას, რომლის მიხედვითაც პრეზიდენტმა 60 დღეზე მეტი ხნის განმავლობაში სამხედრო მოქმედებების გაგრძელებისთვის კონგრესს ოფიციალური ნებართვისთვის უნდა მიმართოს. 1-ელ მაისს ირანში ომის დაწყებიდან 60 დღე გავიდა.
ამასთან, დონალდ ტრამპი კონგრესისთვის გაგზავნილ წერილში სამხედრო მოქმედებების გაგრძელებას არ გამორიცხავს.
„ირანის რეჟიმის წინააღმდეგ აშშ-ის ოპერაციების წარმატებისა და ხანგრძლივი მშვიდობის უზრუნველყოფის ძალისხმევის მიუხედავად, საფრთხე, რომელსაც ირანი აშშ-ისა და ჩვენი შეიარაღებული ძალებისთვის წარმოადგენს, კვლავ მნიშვნელოვანი რჩება“, - აცხადებს დონალდ ტრამპი.