რა არის ჰანტავირუსი, რომლის შედეგად, ატლანტის ოკეანეში, საკრუიზო გემზე სამი ადამიანი გარდაიცვალა?

ატლანტის ოკეანეში მცურავ საკრუიზო გემზე, ჰანტავირუსის სავარაუდო გავრცელების შედეგად, სამი ადამიანი დაიღუპა, - ინფორმაციას BBC-ი ჯანდაცვის მსოფლიო ორგანიზაციაზე (WHO) დაყრდნობით ავრცელებს.

ორგანიზაციის ცნობით, გემზე ვირუსის ერთი შემთხვევა ლაბორატორიულად დადასტურდა, მიმდინარეობს კიდევ ხუთი საეჭვო შემთხვევის კვლევა.

დაღუპულებიდან ორი ნიდერლანდების, ერთი კი ბრიტანეთის მოქალაქეა.

გემი, რომელზეც 150-მდე მგზავრი იმყოფებოდა, არგენტინიდან კაბო-ვერდესკენ დაახლოებით სამი კვირის წინ გაემგზავრა.

რა არის ჰანტავირუსი?

ეს ვირუსი პირველად აზიის ქვეყნებში 1950 წელს გამოვლინდა. ეს დაავადება ადამიანებში ძალიან იშვიათად გვხვდება.

• "ის ვრცელდება ვირთხებისგან და თაგვებისგან, თუ ადამიანი შეჭამს მათ. ადამიანიდან ადამიანზე გადადება არის ძალიან იშვიათი“ - ამბობს ვედი მეცნიერი, ექიმი სუამია შაიქი.

აშშ-ის დაავადებათა კონტროლისა და პრევენციის ცენტრის განცხადებით, ჰანტავირუსი იშვიათია, მაგრამ სიკვდილიანობის მაღალი პროცენტულობა ახასიათებს. კერძოდ - 38%.

მათივე ცნობით, გარდა ვირთხის ხორცის ჭამისა, ის შეიძლება გამოიწვიოს ინფიცირებული ვირთხის, ან თაგვის ნაკბენმაც. ახასიათებს კორონავირუსის მსგავსი სიმპტომები - მაღალი ტემპერატურა, თავის ტკივილი, ხველება და სუნთქვის გართულება. აშშ-ში ადამიანებს შორის ჰანტავირუსის გადადების შემთხვევა არ არის დაფიქსირებული - წერს ნიუ იორკ პოსტი. გამოცემა ამერიკის დაავადებათა კონტროლის ეროვნული ცენტრის ინფორმაციაზე დაყრდნობით იმასაც აღნიშნავს, რომ წარსულში ჩილესა და არგენტინაში ჰანტავირუსის ადამიანიდან ადამიანზე გადაცემის მხოლოდ რამდენიმე შემთხვევა დაფიქსირდა.