სამხრეთ აფრიკაში კაცი, რომელიც მდინარემ გაიტაცა, სავარაუდოდ, ნიანგმა შეჭამა - მტაცებლის მუცელში ადამიანის სხეულის ნაწილები იპოვეს

მედიაში სამხრეთ აფრიკაში გადაღებული დრამატული ვიდეო ვრცელდება - კადრებში ჩანს, როგორ ამოჰყავთ მდინარიდან ნიანგი, რომელმაც, სავარაუდოდ, სასტუმროს მეპატრონე შეჭამა.

• 59 წლის გაბრიელ ბატისტა ძლიერი წყალდიდობის დროს გაუჩინარდა. სამხრეთ აფრიკაში სტიქიურმა მოვლენამ მდინარის დონის მკვეთრი მატება გამოიწვია.

• მამაკაცი წყალმა გაიტაცა, რის შემდეგაც შესაძლოა, ნიანგის თავდასხმის მსხვერპლი გახდა. რეგიონში ნიანგების დიდი რაოდენობაა და მსგავსი საფრთხე რეალურია.

შემთხვევა გასულ ორშაბათს მოხდა, როდესაც ბიზნესმენი დატბორილი დაბალი ხიდის გადაკვეთას ცდილობდა. სწრაფმა და ძლიერმა დინებამ მისი 4×4 Ford Ranger კლდეებისკენ გადაისროლა. არსებული ვერსიით, ბიზნესმენი მანქანიდან გადმოვიდა და უსაფრთხო ადგილისკენ გაქცევას ცდილობდა.

თუმცა, ვარაუდობენ, რომ მდინარე კომატის ძლიერმა ნაკადმა იგი წააქცია და გაიტაცა.

• პოლიცია ოთხი დღის განმავლობაში დრონებით აკვირდებოდა ნიანგს, სანამ მოკლავდა. შემდგომ, ნახევარტონიანი მტაცებელი ახლომდებარე კრუგერის ეროვნულ პარკში გადაიყვანეს და მუცლის გამოკვლევა ჩაუტარეს - ექსპერტიზის შედეგად ნაპოვნი იქნა ადამიანის ნეშტის ნაწილები, მათ შორის ხელები და სხვა ანატომიური ფრაგმენტები. ნიანგის მუცელში ნაპოვნ ადამიანის ხელის ერთ-ერთ თითზე აღმოჩნდა ბეჭედი, რომელიც, სავარაუდოდ, 59 წლის გაუჩინარებულ ბიზნესმენს, გაბრიელ ბატისტას ეკუთვნოდა.

ამ ეტაპზე ელოდებიან დნმ-ის ანალიზის პასუხს, რათა საბოლოოდ გაირკვეს თუ ვისი ცხედარია.

"დრონის საშუალებით დავაკვირდით ხიდიდან დაახლოებით 60 მეტრში მდებარე კუნძულს, სადაც რამდენიმე ნიანგი იმყოფებოდა. გამოვყავით ერთი კონკრეტული, რომელზეც ეჭვი გვქონდა. ეს იყო ძალიან დიდი ზომის ცხოველი, რომელიც თითქმის არ მოძრაობდა. მუცელი საგრძნობლად იყო გადიდებული და წყალსაც თავს არიდებდა",- ნათქვამია პოლიციის განცხადებაში.

პოლიციისთვის მოულოდნელი აღმოჩნდა კიდევ ერთი დეტალი - მპუმალანგის პროვინციაში მიმდინარე გამოძიების დროს ნიანგის მუცელში ექვსი წყვილი ფეხსაცმელიც იპოვეს. ისინი, როგორც ცნობილია, ბატისტას არ ეკუთვნოდა.

• ველური ბუნების ექსპერტების თქმით, ნიანგები პლასტმასის მონელებას ვერ ახერხებენ, ამიტომ მათი ორგანიზმიდან ამოღებული ნარჩენები უცვლელი სახით გვხვდება. აღმოჩენილ მასალებს შორის იყო სხვადასხვა ტიპის ფეხსაცმელი - სანდლები, სპორტული ფეხსაცმელი და მაღალქუსლიანი ფეხსაცმელებიც.

ნიანგის ევთანაზიისთვის შესაბამისი ნებართვა შაბათს გაიცა, რის შემდეგაც ის პოლიციის ვერტმფრენიდან ერთი გასროლით გაანეიტრალეს.

ნიანგი აფრიკის ერთ-ერთ ყველაზე საშიშ მტაცებლად ითვლება. მისი ნაკბენი ცხოველთა სამყაროში ერთ-ერთ ყველაზე მძლავრად მიიჩნევა და დიდი თეთრი ზვიგენის ნაკბენსაც მნიშვნელოვნად აღემატება. ისინი სიგრძეში დაახლოებით 6 მეტრამდე იზრდებიან, წონა კი 700 კილოგრამს (და მეტსაც) აღწევს. ექსპერტების თქმით, ნიანგები აფრიკაში ყოველწლიურად ასობით, ზოგიერთ მონაცემზე დაყრდნობით კი დაახლოებით 1000-მდე ადამიანს კლავენ.

წყარო