კვლევა, რომლის შემდეგაც მეცნიერები დააბნია -  თურმე ქალაქის ფრინველებს ქალების უფრო ეშინიათ, ვიდრე მამაკაცების

ახალმა კვლევამ აჩვენა, რომ ცხოველები ადამიანებს სქესის მიხედვით მკაფიოდ ასხვავებენ და მათ მიმართ ქცევასაც შესაბამისად ცვლიან. იტალიელმა მეცნიერებმა, ჟურნალში People and Nature გამოქვეყნებული ნაშრომის ფარგლებში, უცნაური კანონზომიერება აღმოაჩინეს, რომლის ზუსტი მიზეზი ჯერჯერობით დაუდგენელია.

• ექსპერიმენტის დეტალები

კვლევა ევროპის ხუთ ქვეყანაში (ჩეხეთი, საფრანგეთი, გერმანია, პოლონეთი და ესპანეთი) ჩატარდა. სპეციალისტებმა 2023 წლის გაზაფხულზე, ქალაქის პარკებსა და სკვერებში, 37 სახეობის ფრინველის ქცევის 2581 შემთხვევა შეისწავლეს.

ექსპერიმენტის სიზუსტისთვის მეცნიერებმა მაქსიმალური კონტროლი დააწესეს:

დამკვირვებლები (ქალი და მამაკაცი) იყვნენ ერთი სიმაღლის. ეცვათ იდენტური ფერის (თეთრი, ნაცრისფერი ან შავი) ტანსაცმელი. ვიზუალური განსხვავებების შესამცირებლად, დამკვირვებლები თმასაც კი მალავდნენ.

მიუხედავად ვიზუალური მსგავსების მცდელობისა, შედეგი სტაბილური აღმოჩნდა: ფრინველები მამაკაცებს, ქალებთან შედარებით, საშუალოდ 1 მეტრით (ანუ 11%-ით) უფრო ახლოს უშვებდნენ. ეს ტენდენცია გამოვლინდა ხუთივე ქვეყანაში და თითქმის ყველა შესწავლილ სახეობაში. აღსანიშნავია ისიც, რომ მამალი ფრინველები უფრო თამამები აღმოჩნდნენ, ვიდრე დედლები.

• რატომ ეშინიათ ფრინველებს ქალების?

მეცნიერებს ამ კითხვაზე ზუსტი პასუხი არ აქვთ, თუმცა რამდენიმე ჰიპოთეზას განიხილავენ:

სიარულის მანერა: შესაძლოა, ფრინველები რეაგირებენ მოძრაობის სპეციფიკაზე (მაგალითად, თეძოების მოძრაობაზე).

სუნი და ხმა: ბიოლოგიური ინდიკატორები, რომლებიც ადამიანისთვის შეუმჩნეველია.

გენეტიკური მეხსიერება: არსებობს მოსაზრება, რომ შორეულ წარსულში, შემგროვებლობის პერიოდში, ქალები უფრო ხშირად ნადირობდნენ მცირე ზომის ნადავლზე, მათ შორის ფრინველებზე.

ეს არ არის პირველი შემთხვევა, როცა ცხოველები სქესის მიხედვით განსხვავებულ რეაქციას ავლენენ: უნგრელი მეცნიერების დაკვირვებით, ძაღლების ტვინი უფრო აქტიურად რეაგირებს ქალის ხმაზე, რაც, სავარაუდოდ, მაღალი ტონითა და გამოკვეთილი ინტონაციით არის განპირობებული. კვლევები აჩვენებს, რომ კატები უფრო ხშირად გამოსცემენ ხმოვან სიგნალებს მამაკაცი პატრონების მიმართ. მეცნიერები ვარაუდობენ, რომ კატები ამით მამაკაცების "ნაკლებ მგრძნობელობას" აკომპენსირებენ და მეტ ძალისხმევას ხარჯავენ მათი ყურადღების მისაქცევად.