31 წლის დავით წოწკოლაურის მკვლელობაში ბრალდებულებს ბრალი წარედგინათ - "იძალადეს მასზე და დანით ჭრილობები მიაყენეს"

31 წლის დავით წოწკოლაურის მკვლელობაში ბრალდებულებს ბრალი წარედგინათ. ინფორმაციას პროკურატურა ავრცელებს.

"საქართველოს პროკურატურამ დამამძიმებელ გარემოებებში, განზრახ მკვლელობის ფაქტზე ორ პირს ბრალდება წარუდგინა.

• შინაგან საქმეთა სამინისტროს მიერ ჩატარებული გამოძიებით დადგინდა, რომ 2026 წლის 8 მაისს ქ. თბილისში, ჟ. შარტავას ქუჩაზე, ბრალდებულმა, წარსულში არსებული უთანხმოების გამო, ჯგუფურად, ფიზიკურად იძალადეს დაზარალებულზე და სხეულის სხვადასხვა არეში დანით მრავლობითი ჭრილობები მიაყენეს. მიღებული დაზიანებების შედეგად, დაზარალებული შემთხვევის ადგილზე გარდაიცვალა.

სამართალდამცველებმა ბრალდებულები იმავე დღეს დააკავეს. მათ ბრალდება საქართველოს სისხლის სამართლის კოდექსის 109-ე მუხლის „ი“ ქვეპუნქტებით (განზრახ მკვლელობა, ჩადენილი ჯგუფურად) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს. პროკურატურა ბრალდებულების მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს" - ნათქვამია ინფორმაციაში.

ცნობისთვის, თბილისში, შარტავას ქუჩაზე მკვლელობა გუშინ მოხდა. ახალგაზრდა მამაკაცი ცივი იარაღით კორპუსთან მოკლეს. პოლიციამ 2 პირი დააკავა.