რა ვიცით პატრიარქის ინტრონიზაციაზე, რომელიც დღეს სვეტიცხოველში გაიმართება
ახალი პატრიარქის ინტრონიზაცია დღეს, 12 მაისს, სვეტიცხოვლის საკათედრო ტაძარში გაიმართება. ამის შესახებ ქვეყნის 142-ე კათოლიკოს - პატრიარქმა,შიო III-მ განაცხადა.
როგორც ახალარჩეულმა პატრიარქმა, შიო მესამემ აღნიშნა, მსახურება დაიწყება 10:00 საათზე.
"ტრადიციის მიხედვით, გამორჩევის შემდეგ, პირველივე კვირას, თუ დიდ დღესასწაულზე უკვე უნდა იმსახუროს კათოლიკოს-პატრიარქმა. უახლოესი ასეთი დღესასწაული გახლავთ ხვალ. ეს არის ანდრია პირველწოდებულის საქართველოში შემოსვლა და ყოვლადწმინდა ღვთისმშობლის წილხვდომილობის დღესასწაული, ამიტომ ჩვენ გადავწყვიტეთ, რომ ინტრონიზაცია შედგება 12 მაისს, სვეტიცხოვლის საკათედრო ტაძარში. მსახურება დაიწყება 10:00 საათზე“,- აღნიშნა ახალარჩეულმა პატრიარქმა, შიო III-მ.
პროცედურა:
- ქიროტონიით უპირატესი მღვდელმთავრები ახალ პატრიარქს წაუკითხავენ პატრიარქად გამორჩევის ლოცვას.
- გადასცემენ საპატრიარქო მიტრას, ასევე კუნკულ-ბარტყულს (თავსაბურავს) და ჯვარ-პანაღიასა და კვერთხს.
- შიო მესამეს ასევე მიმართავს არქიდიაკონი, დემეტრე დავითაშვილი.
რით შეიმოსება შიო III ინტრონიზაციისას
გორისა და ატენის მიტროპოლიტის მეუფე ანდრიას თქმით, საქართველოს კათოლიკოს-პატრიარქს, შიო მესამეს ინტრონიზაციისთვის შესამოსელი ჯერ არ აქვს, ამიტომ, სავარაუდოდ, ილია მეორის შესამოსელს გამოიყენებენ.
„ყველას გილოცავთ დღევანდელ დღეს. ეს ღირსშესანიშნავი და ეპოქალური მოვლენა არის. მოხდა ახალი, სრულიად საქართველოს კათოლიკოს-პატრიარქის არჩევა, რომელიც წმინდა და გაფართოებულმა კრებამ გამოარჩია მაღალყოვლადუსამღვდელოესი, სენაკისა და ჩხოროწყუს მიტროპოლიტი შიო, რომელსაც უკვე უწმინდესისა და უნეტარესის, კათოლიკოს-პატრიარქის რანგში ჩვენ მოვიხსენიებთ შიო III-დ.
თბილისის მერია პატრიარქის ინტრონიზაციაზე დასწრების მსურველთა უფასო ტრანსპორტირებას უზრუნველყოფს.
მოქალაქეები მუნიციპალური ავტობუსებით პირველი რესპუბლიკის მოედნიდან სვეტიცხოვლის საკათედრო ტაძრამდე, ქვეყნის 142-ე პატრიარქის ინტრონიზაციის დასრულების შემდეგ კი ისევ რესპუბლიკის მოედნამდე იმგზავრებენ.საზოგადოებრივი ტრანსპორტი 12 მაისს, 08:00 საათზე გავა თბილისიდან მცხეთის მიმართულებით.
სწორედ სვეტიცხოველში, 1977 წლის 25 დეკემბერი გაიმართა ილია მეორის ინტრონიზაცია.
ცნობისთვის, საქართველოს ეკლესიამ ახალი კათოლიკოს- პატრიარქი აირჩია. ქვეყნის 142-ე კათოლიკოს - პატრიარქი საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი) გახდა. მეუფე შიომ 22 ხმა მიიღო. რაც შეეხება პატრიარქობის სხვა კანდიდატებს, ურბნისისა და რუისის ეპარქიის მიტროპოლიტმა იობმა 9 ხმა მიიღო, ფოთისა და ხობის მიტროპოლიტმა გრიგოლმა კი 7 ხმა. გაუქმდა ერთი ხმა.
საქართველოს კათოლიკოს- პატრიარქი გაფართოებულ საეკლესიო კრებაზე აირჩიეს.
შეგახსენებთ, სრულიად საქართველოს კათოლიკოს-პატრიარქი, უწმინდესი და უნეტარესი ილია II 93 წლის ასაკში 2026 წლის 17 მარტს გარდაიცვალა, რის შემდეგაც დღის წესრიგში დადგა საქართველოს მართლმადიდებელი ეკლესიის ახალი მამამთავრის არჩევის საკითხი.