ბრძოლა პაციენტისთვის, რომელსაც გული გაუჩერდა - როგორ გადაარჩინა რუსთავის სასწრაფო დახმარების მე-2 ბრიგადამ 85 წლის ბებია?

როდესაც წამები წყვეტენ ყველაფერს და ზღვარი სიცოცხლესა და სიკვდილს შორის ძალიან ვიწროვდება, პროფესიონალიზმი და სწრაფი რეაგირება გადამწყვეტია. რუსთავის სასწრაფო დახმარების მე-2 ბრიგადამ კიდევ ერთი დაუჯერებელი გადარჩენის ისტორია დაწერა, რომლის დროსაც 85 წლის პაციენტის სიცოცხლისთვის ბრძოლა ნამდვილ გმირობად იქცა. ამაღელვებელ ამბავს "ფეისბუქგვერდი" "შენი სიცოცხლის გადასარჩენად“ ავრცელებს

"სასწრაფო დახმარების რუსთავის მე-2 ბრიგადამ გამოძახება მიიღო შეფასებით "უგონო“. სასწრაფო დახმარების ბრიგადას ადგილზე 85 წლამდე ქალბატონი უგონო მდგომარეობაში დახვდა. პარამედიკოსი ნანა ლაზარაშვილი იხსენებს, რომ მისვლისას პაციენტი არ სუნთქავდა და მაგისტრალურ არტერიაზე პულსი არ ისინჯებოდა.

ოჯახში ქალბატონის შვილიშვილები იმყოფებოდნენ, რომელთა გადმოცემითაც ბებომ მოულოდნელად თავი შეუძლოდ იგრძნო, რის შემდეგაც უეცრად გონება დაკარგა. სასწრაფო დახმარების ბრიგადამ დაუყოვნებლივ დაიწყო გულ-ფილტვის რეანიმაცია, მონიტორზე ასისტოლია ფიქსირდებოდა, ვინაიდან მედიკამენტების ინტრავენულად შეყვანა შეუძლებელი იყო, პარამედიკოსმა ნანა ლაზარაშვილმა ადრენალინის მისაწოდებლად ძვალ შიდა კათეტერი გამოიყენა.

უწყვეტი რეანიმაციული ღონისძიებების შედეგად საძილე არტერიაზე პულსაცია გაჩნდა, მონიტორზე სინუსური რიტმი დაფიქსირდა, აღდგა სუნთქვა და სასწრაფო დახმარების ბრიგადამ პაციენტი გლაზგოს შკალის 10 ქულით უახლოეს კლინიკაში გადაიყვანა, სადაც მკურნალობა რეანიმაციულ განყოფილებაში გაგრძელდა.

პაციენტს ჰიპოკალემია დაუდგინდა, რამაც გულის გაჩერება გამოიწვია. ამჟამად პაციენტი პალატაშია გადაყვანილი, თავს კარგად გრძნობს და ბინაზე მალე გაეწერება.

ნანა ლაზარაშვილი საუბარში აღნიშნავს, რომ პაციენტის გადარჩენაში უდიდესი წვლილი მიუძღვის ექთანს ირმა შავშიშვილს და მძღოლს პაატა რთველიაშვილს".