ვირთხის მოსაკლავი შხამი საზამთროში? - ინდოეთში მომაკვდინებელი ნივთიერებით ოჯახის 4 წევრი დაიღუპა: რა დეტალებია ცნობილი იდუმალებით მოცულ ტრაგედიაზე
ინდოეთში, მუმბაის პიდონიეს რაიონში, ოთხსულიანი ოჯახის წევრები საკუთარ სახლში გარდაცვლილი იპოვეს, შემთხვევა 25 აპრილს მოხდა. გარდაცვლილები არიან აბდულა დოკადია, მისი მეუღლე ნასრინი და მათი ორი ქალიშვილი, აიეშა და ზაინაბი.
- სამართალდამცავების ინფორმაციით, მომხდარს ჯერ კიდევ არ აქვს საბოლოო ახსნა. ინდური მედია თავდაპირველად წერდა, რომ ოჯახმა გაფუჭებული საზამთრო ჭამა, რასაც ფატალური შედეგი მოჰყვა.
- მოგვიანებით კი სამართალდამცველებმა განაცხადეს, რომ სიკვდილის მიზეზი თუთიის ფოსფიდი იყო - უკიდურესად ტოქსიკური ქიმიური ნივთიერება, რომელიც ხშირად გამოიყენება ვირთხების მოსაკლავად. პოლიციის თქმით, ეს ნივთიერება აღმოაჩინეს გარდაცვლილების ორგანოებში და საზამთროს ნაყოფის ნარჩენებში.
როგორც მუმბაის პოლიციის წარმომადგენლებმა BBC-ს განუცხადეს, ჯერ კიდევ არ არის გარკვეული როგორ მოხვდა თუთიის ფოსფიდი საზამთროში.
"ჩვენ კვლავ ვაგროვებთ მტკიცებულებებს. არ გამოვრიცხავთ არც მკვლელობას, არც შემთხვევით სიკვდილს, არც თვითმკვლელობას", - აცხადებენ სამართალდამცველები.
- გამოძიების ცნობით, იმ ღამეს ოჯახმა რამდენიმე ნათესავს უმასპინძლა. სტუმრები 22:30 საათზე წავიდნენ. მალევე ოჯახის წევრები ავად გახდნენ.
"ყველას ღებინება და დიარეა დაეწყო. ისინი ახლომდებარე საავადმყოფოში გადაიყვანეს. სამწუხაროდ, ოთხივე გარდაიცვალა“, - ამბობს გამომძიებელი.