შეიარაღებულმა პირებმა ნიგერიის სკოლებიდან 50-ზე მეტი ბავშვი გაიტაცეს - მათი უმეტესობა 2-5 წლამდეა: რას წერს მედია
შეიარაღებულმა პირებმა ნიგერიის ჩრდილო-აღმოსავლეთით მდებარე ქალაქის სამი სკოლიდან 50-ზე მეტი ბავშვი გაიტაცეს. გატაცებულთა უმეტესობა 2-5 წლამდეა.
ბორნოს შტატის ქალაქ მუსაში თავდასხმების თვითმხილველები ჰყვებიან, რომ გამტაცებლებმა მოტოციკლებით გაქცევის დროს ბავშვები ცოცხალ ფარებად გამოიყენეს, რათა უსაფრთხოების ძალებს მათთვის ცეცხლი არ გაეხსნათ.
- სკოლებზე თავდასხმებზე პასუხისმგებლობა ჯერ არცერთ დაჯგუფებას არ აუღია საკუთარ თავზე.
გატაცებები ქალაქის სამთავრობო საშუალო სკოლაში, მუსას ცენტრალურ დაწყებით სკოლაში და სახელმწიფო უნივერსალური საბაზისო განათლების საბჭოს საშუალო სკოლაში მოხდა. ზოგიერთი ცნობით, თავდასხმებს "ბოკო ჰარამის" დამახასიათებელი ნიშანი ჰქონდა (ბოკო ჰარამი - ისლამისტური დაჯგუფება, რომელიც რეგიონის კონტროლისთვის იბრძვის).
-
მუსას ცენტრალური დაწყებითი სკოლის დირექტორმა, აბდუ დუნამამ, აღწერა, რომ შეიარაღებული პირების სკოლაში შეჭრამდე და ბავშვების ალყაში მოქცევამდე, მან გასროლის ხმები გაიგო. მისივე თქმით, გამტაცებლებმა 5 წლამდე ასაკის ბავშვები საბავშვო ბაღის საკლასო ოთახებიდან გაიტაცეს.
თვითმხილველთა მიხედვით, შეიარაღებული პირები სკოლაში მყოფი ბავშვების მშობლების მიმართულებით ისროდნენ: “ბევრი მშობელი უმწეოდ უყურებდა ახლომდებარე გორაკიდან, თუ როგორ სვამდნენ მათ შვილებს მოტოციკლებზე და მიჰყავდათ“.
ძირითადად ფერმერული თემი, რომელიც ისედაც ეკონომიკურად გაჭირვებულია, ახლა განგაშით მიმართავს მთავრობას, რომ ბავშვების სახლებში უსაფრთხოდ დაბრუნებაში დაეხმარონ.
წყარო: bbc.com
მოამზადა: ანა სიბოშვილმა