აშშ-ში საქართველოს მოქალაქეს 15-წლიანი პატიმრობა მიუსაჯეს - რა არის ცნობილი 22 წლის მიხეილ ჩხიკვიშვილზე და რატომ ატირდა სასამართლოზე "ყასაბი კომანდირი"?

ბრუკლინის ფედერალურმა სასამართლომ 15 წლით თავისუფლების აღკვეთა მიუსაჯა საქართველოს მოქალაქეს, 22 წლის მიხეილ ჩხიკვიშვილს, რომელიც საერთაშორისო ნეონაცისტური ექსტრემისტული დაჯგუფების, "მანიაკების მკვლელობის კულტის“ (Maniac Murder Cult - MKY) ლიდერია. ინტერნეტსივრცეში იგი ცნობილი იყო ფსევდონიმით "ყასაბი კომანდირი“.

გამოძიების თანახმად, ჩხიკვიშვილი გეგმავდა მასობრივი განადგურების ტერაქტებს, ავრცელებდა ბომბებისა და მომწამვლელი ნივთიერებების დამზადების ინსტრუქციებს და მოუწოდებდა სხვებს რასობრივი და რელიგიური უმცირესობების, მათ შორის ბავშვების მკვლელობისკენ.

• დანაშაულებრივი იდეოლოგია

მიხეილ ჩხიკვიშვილის ადვოკატის განცხადებით, მისი კლიენტის რადიკალიზაცია 15 წლის ასაკში დაიწყო, როდესაც იგი სოციალური მედიის ალგორითმებმა სიძულვილის ენით გაჯერებულ "მორევში“ ჩაითრია. მოგვიანებით მან დაწერა მანიფესტი სახელწოდებით "მოძულეთა სახელმძღვანელო“, რომელსაც 2021 წლის სექტემბრიდან აქტიურად ავრცელებდა ორგანიზაციის წევრებს შორის. ამ მანიფესტში იგი ამტკიცებდა, რომ "თეთრი რასისთვის მკვლელობა ჰქონდა ჩადენილი“, საკუთარ სულიერ ლიდერად სატანას მოიხსენიებდა, ხოლო ადოლფ ჰიტლერს ისტორიაში უდიდეს ადამიანად მიიჩნევდა.

• შემზარავი საახალწლო გეგმა და გამოაშკარავება

ჩხიკვიშვილი უშუალოდ იმყოფებოდა ბრუკლინში 2022 წლის ივნისში, რის შემდეგაც ტელეგრამ-არხების მეშვეობით აქტიურად დაიწყო მასობრივი თავდასხმების დაგეგმვა. 2023 წლის ბოლოს მან კავშირი დაამყარა პირთან, რომელიც რეალურად გამოძიების ფედერალური ბიუროს (FBI) ფარული აგენტი აღმოჩნდა. ჩხიკვიშვილმა აგენტს შესთავაზა საზარელი გეგმა: ახალი წლის ღამეს ვინმე სანტა კლაუსის ფორმაში უნდა გამოწყობილიყო და ნიუ-იორკში რასობრივი უმცირესობების ბავშვებისთვის რიცინით (ძლიერი საწამლავით) მოწამლული ტკბილეული დაერიგებინა.

2024 წლის იანვარში გეგმა შეიცვალა. ქართველმა ექსტრემისტმა ფარულ აგენტს დაავალა, რომ თავდასხმის მთავარი სამიზნე ებრაული თემი, კერძოდ კი, ბრუკლინში მდებარე ებრაული სკოლები და იქაური ბავშვები ყოფილიყვნენ, რათა ებრაელი ბავშვები დაეხოცათ. მანვე აგენტს გაუგზავნა დეტალური სახელმძღვანელოები მომწამვლელი გაზებისა და საწამლავების დამზადების შესახებ.

• საერთაშორისო კვალი და სისხლიანი შედეგები

"ყასაბი კომანდირის“ იდეოლოგიამ და წერილობითმა მანიფესტმა მსოფლიოს სხვადასხვა წერტილში რეალური ტრაგედიები გამოიწვია.

თურქეთში, 2024 წლის აგვისტოში, ესქიშეჰირის მეჩეთთან თავდამსხმელმა ნაცისტური სიმბოლიკის მქონე ტაქტიკური ჟილეტით 5 ადამიანი დაჭრა და პროცესი პირდაპირ ეთერში გადასცა. მის მიერ გავრცელებულ ტექსტებში პირდაპირი მითითებები იყო ჩხიკვიშვილსა და მის მანიფესტზე.

აშშ-ში, 2025 წლის იანვარში, ტენესის შტატის ქალაქ ნეშვილის ანტიოქიის უმაღლეს სკოლაში 17 წლის სოლომონ ჰენდერსონმა ცეცხლი გახსნა, რის შედეგადაც დაიღუპა 16 წლის მოსწავლე, კიდევ ერთი კი დაიჭრა. თავდამსხმელმა სიცოცხლე თვითმკვლელობით დაასრულა. თავდასხმამდე გამოქვეყნებულ აუდიოჩანაწერში და საკუთარ მანიფესტში იგი ღიად აცხადებდა, რომ მოქმედებდა "მანიაკების მკვლელობის კულტის“ სახელით და პირდაპირ ახსენებდა მიხეილ ჩხიკვიშვილს.

• დაპატიმრება, ექსტრადიცია და სასამართლო პროცესი

მიხეილ ჩხიკვიშვილი 2024 წლის ივლისში მოლდოვაში დააკავეს, სადაც იგი 11 თვის განმავლობაში მძიმე პირობებში იმყოფებოდა საპატიმროში. საინტერესოა, რომ იქ ყოფნისას მან ციხის ზედამხედველის გადაბირებაც კი სცადა ნეონაცისტურ იდეოლოგიაზე. 2025 წლის მაისში მოლდოვამ მისი ექსტრადიცია აშშ-ში განახორციელა. მოგვიანებით, ბრუკლინის ფედერალურ ციხეში ყოფნისას, მას საიდუმლოდ შენახული მობილური ტელეფონი უპოვეს, რომელშიც ტელეგრამ არხი ჰქონდა გადმოწერილი.

2025 წლის ნოემბერში ჩხიკვიშვილმა ბრალი აღიარა. სასამართლო პროცესზე დაცვის მხარე ამტკიცებდა, რომ ახალგაზრდა კაცი მძიმე დეპრესიით იტანჯებოდა, ალკოჰოლზე იყო დამოკიდებული და ციხეში ყოფნისას შეიცვალა. ინტერნეტის გარეშე დარჩენილმა ნელსონ მანდელას ბიოგრაფიისა და ბერძნული ლიტერატურის კითხვა დაიწყო. თუმცა მოსამართლე კეროლ ბეგლი ამონი ამ არგუმენტების მიმართ სკეპტიკურად განეწყო და აღნიშნა, რომ ალკოჰოლური თრობა ვერ ახსნიდა საწამლავების დამზადების ასეთი რთული წიგნების წერას.

განაჩენის გამოტანამდე სასამართლოს ტელეფონით მიმართა ტენესის სკოლაში მომხდარი სროლის ერთ-ერთმა გადარჩენილმა მსხვერპლმა, რომელმაც აღნიშნა, რომ ჩხიკვიშვილის ქმედებებმა მას ბავშვობა წაართვა და სამუდამო ტრავმა დაუტოვა. პროკურორის გამოსვლისას ჩხიკვიშვილმა იტირა, დაზარალებულ გოგონას მამაცობისთვის მადლობა გადაუხადა და საკუთარ თავს "სულელი მშიშარა“ უწოდა. მან დასძინა, რომ ისურვებდა, ახალგაზრდებს მისი გზა არასოდეს გაემეორებინათ.

მიუხედავად სინანულისა, ამერიკულმა მართლმსაჯულებამ, FBI-ის, ნიუ-იორკის პოლიციისა და საერთაშორისო პარტნიორების ერთობლივი მუშაობის შედეგად, იგი საზოგადოებისთვის საშიშ მონსტრად მიიჩნია და ხანგრძლივი პატიმრობა შეუფარდა, რითაც რასობრივად მოტივირებული მასობრივი ტერაქტი თავიდან იქნა აცილებული. წყარო

წაიკითხეთ ასევე:

• "წერდა, რომ სძულდა აზიელები... ტერორიზმის ამსახველ ვიდეოს უგზავნიდა კლასელებს" - რას იხსენებენ 161-ე სკოლაში აშშ-ში უმძიმესი ბრალდებით დაკავებულ მიხეილ ჩხიკვიშვილზე?