იაპონიაში დააკავეს ამერიკელი ტურისტები, რომლებიც ცნობილი მაიმუნის გალიაში შეიჭრნენ: ერთ-ერთს პანჩისთვის სათამაშოს ჩუქება უნდოდა (ფოტო/ვიდეო)

ტოკიოს გარეუბნის, ჩიბას პოლიციამ 24 წლის რიდ ჯანაი დეისუნი და 27 წლის ნილ ჯაბაჰრი დუანი მას შემდეგ დააკავა, რაც ერთ-ერთი მათგანი პოპულარული მაიმუნის, პანჩის გალიაში შეიჭრა - მეორე კი ამ ყველაფერს იღებდა.

• გადაღებულ კადრებში ჩანს ერთ-ერთი ამერიკელი ტურისტი, რომელსაც “სმაილის“ კოსტიუმი აცვია, გალიის ღობეზე ხტება და მაიმუნებისკენ მიემართება. გარშემომყოფები გაოცებულები უყურებენ სანახაობას.

ახალგაზრდას თან ჰქონდა რბილი სათამაშო - სავარაუდოდ, სათამაშოს ჩუქება მას პანჩისთვის უნდოდა.

• დაკავების შემდეგ დეისუნმა თავი კოლეჯის სტუდენტად წარადგინა, დუანმა კი - მომღერლად. ორივე მამაკაცის სოციალური მედიის ანგარიშებზე განთავსებულია პოსტები, სადაც ისინი ჰყვებიან თავიანთი მოგზაურობების, ძვირადღირებული საათების, ავტომობილებისა და ფუფუნებაში ცხოვრების შესახებ.

დუანის თქმით, ის კალიფორნიაში მოღვაწე მომღერალია. დეისუნმა კი შაბათს გამოაქვეყნა ფოტო, სადაც იგი ტოკიოს ქუჩების შუაგულში დგას.

გალიაში შესული სტუდენტი ზოოპარკის თანამშრომელმა გამოიყვანა, მოგვიანებით დაცვას დაუძახეს, რის შემდეგაც ორივე პოლიციამ გაარიდა ადგილს.

• დეისუნსა და დუანს ბრალი ზოოპარკის საქმიანობისთვის ხელის შეშლაში წაუყენეს; ამჟამად ზოოპარკი ბადეებსა და მუდმივ პატრულს ამონტაჟებს გალიის დასაცავად.

ზოოპარკის ადმინისტრაციის განცხადებით, ინციდენტის დროს ყველა ცხოველი უსაფრთხოდ იყო, მათ შორის პანჩიც - პატარა მაკაკა, რომელიც გასულ ივლისს, სასტიკი სიცხის დროს, რთული მშობიარობის შემდეგ დედამ მიატოვა. ბუნებრივი მზრუნველობის გარეშე დარჩენილი მაიმუნის ერთადერთი ნუგეში პლუშის სათამაშო გახდა. სწორედ ამ გარემოებების გამო გახდა პანჩი მსოფლიოში ცნობილი ცხოველი.

წყარო

იხილეთ ასევე:

• დედისგან მიტოვებული პატარა პანჩი ზრდასრულმა პრიმატებმა გარიყეს, მისი ნუგეში პლუშის სათამაშოა, რომელიც დედა ჰგონია და ყველგან დაატარებს (ფოტო/ვიდეო)