"ქეითი საოცარია. ბოლო რამდენიმე წლის განმავლობაში იმდენი რამ გადაიტანა..." - პრინცმა უილიამმა პირველად ისაუბრა მეუღლის ჯანმრთელობის თაობაზე?

პრინცმა უილიამმა პირველად ისაუბრა თავისი მეუღლის, ქეით მიდლტონის ჯანმრთელობის მდგომარეობასა და რეაბილიტაციაზე ონკოლოგიურ დაავადებასთან ბრძოლის შემდეგ. შესაბამისი განცხადება მან Heart Breakfast-თან ინტერვიუში, სკოლამდელი ასაკის ბავშვთა მხარდაჭერის პროგრამის ფარგლებში, იტალიაში სამუშაო ვიზიტის შემდეგ გააკეთა.

"ქეითი საოცარია. ბოლო რამდენიმე წლის განმავლობაში იმდენი რამ გადაიტანა. სიმართლე გითხრათ, ძალიან ელოდებოდა იტალიაში მოგზაურობას, ამიტომ მიხარია, რომ ყველაფერმა ასე კარგად ჩაიარა. ახლა ის ღმერთმა იცის, რამდენ დროს ატარებს ამ ყველა დოკუმენტის განხილვაში. ის ნამდვილი სპეციალისტია სკოლამდელი ასაკის ბავშვთა განვითარების საკითხებში", - აღნიშნა პრინცმა უილიამმა.

მისი თქმით, ამჟამად ქეით მიდლტონი კარგ ფორმაშია:

"ის საოცარი დედაა, საოცარი ცოლი და, პირდაპირი მნიშვნელობით, ჩვენი ოჯახი მის გარეშე თავს ვერ გაართმევდა. მას სურს კვლავ გააგრძელოს ასეთი მოგზაურობები, თუმცა ეს დიდ ძალისხმევას მოითხოვს. ჩვენ უნდა ვიპოვოთ ბალანსი, თვალი ვადევნოთ, რომ თავი კარგად იგრძნოს და დაისვენოს. მაგრამ ის ნამდვილად კარგ ფორმაშია“.

შეგახსენებთ, 2024 წლის დასაწყისში ქეით მიდლტონმა მუცლის ღრუს ოპერაცია გაიკეთა, რის შემდეგაც ექიმებმა ონკოლოგიური დაავადება აღმოაჩინეს. მოგვიანებით მან საჯაროდ განაცხადა, რომ ქიმიოთერაპიის პროფილაქტიკურ კურსს გადიოდა.

მკურნალობის პერიოდში უელსის პრინცესამ შეამცირა საჯარო ღონისძიებების რაოდენობა და ყურადღება რეაბილიტაციასა და ოჯახზე გაამახვილა. 2025 წლის განმავლობაში იგი თანდათან დაუბრუნდა ოფიციალურ მოვალეობებს.