"გულმკერდის არეში დანით ჭრილობა მიაყენა" - მკვლელობა ჩოხატაურში: ერთ პირს ბრალი წარედგინა

საქართველოს პროკურატურამ ჩოხატაურის მუნიციპალიტეტში მომხდარი განზრახ მკვლელობის ფაქტზე ერთ პირს ბრალდება წარუდგინა.

ამის შესახებ უწყების მიერ გავრცელებულ ინფორმაციაშია ნათქვამი.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 20 მაისს, ჩოხატაურის მუნიციპალიტეტის სოფელ კოხნარში, ბრალდებულმა ურთიერთშელაპარაკებისას თანასოფლელს გულმკერდის არეში დანით ჭრილობა მიაყენა. მიყენებული დაზიანების შედეგად დაზარალებული გარდაიცვალა.

დაკავებულს ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) წარედგინა, რაც სასჯელის სახედ და ზომად 15 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე ბრალდებულს აღკვეთის ღონისძიების სახით პატიმრობა შეეფარდა" - ნათქვამია ინფორმაციაში.

ცნობისთვის, მკვლელობა ჩოხატაურში, სოფელ კოხნარში 20 მაისს მოხდა. 35 წლის ზურა რაზმაძეს სასიკვდილო ჭრილობები ცივი იარაღით მიაყენეს. მკვლელობაში ბრალდებული პოლიციამ იმ დღესვე დააკავა.