პარიზის თითქმის 100 საბავშვო ბაღსა და დაწყებით სკოლაში გამოძიება მიმდინარეობს - სექსუალური ხასიათის ზეწოლა მოსწავლეებზე და სხვა სკანდალური დეტალები

პარიზში, სამშაბათს სკოლის ასისტენტის სასამართლო პროცესი გაიმართება, რომელსაც მის მზრუნველობაში მყოფი მცირეწლოვანი ბავშვების მიმართ სექსუალური ძალადობა ედება ბრალად. საქმე ერთ-ერთია იმ გამოძიებიდან, რომელმაც ბოლო ერთი წლის განმავლობაში საფრანგეთის დედაქალაქის სასკოლო სისტემა სერიოზული კრიტიკის ქვეშ მოაქცია.

• გამოძიება ამ დროისთვის პარიზის თითქმის 100 საბავშვო ბაღსა და დაწყებით სკოლაში მიმდინარეობს. სკოლების არასასწავლო პერსონალის წევრებს - ე.წ. ანიმატორებს - არასათანადო, აგრესიულ და ზოგ შემთხვევაში სექსუალური ხასიათის ქცევაში ადანაშაულებენ.

სამშაბათის საქმე პარიზის მე-11 ოლქში მდებარე ალფონს ბოდენის სახელობის სკოლას ეხება. გამოძიების მიხედვით, ერთ-ერთ ანიმატორს ხუთ ბავშვთან სექსუალური ხასიათის შეხებაში ადანაშაულებენ.

სკანდალმა პარიზში მშობლების ნაწილის უნდობლობა და შიში გააძლიერა. ისინი მერიას ადანაშაულებენ, რომ საჩივრებს თავდაპირველად სათანადო ყურადღება არ მიაქცია.

მშობლებისა და აქტივისტების განცხადებით, ერთ-ერთი მთავარი პრობლემა ანიმატორების არასაკმარისი კვალიფიკაცია და დაბალი ანაზღაურებაა. მათივე თქმით, ზოგ შემთხვევაში სკოლებში თანამშრომლები სრულფასოვანი შემოწმებისა და სათანადო მომზადების გარეშე საქმდებიან.

სკოლის შემდგომი განათლების ასოციაცია SOS-Périscolaire აცხადებს, რომ ბოლო წლებში გახშირდა შემთხვევები, როდესაც ბავშვები ანიმატორების მხრიდან დაცინვაზე, უხეშ მოპყრობასა და ძალადობის სხვა ფორმებზე საუბრობდნენ.

მიმდინარე წლის დასაწყისიდან თითქმის 80 თანამშრომელი უკვე ჩამოშორებულია სამუშაოს.

ამავე დროს, სკოლის ასისტენტები ამბობენ, რომ სკანდალის ფონზე თავადაც მუდმივი ეჭვისა და ზეწოლის ქვეშ აღმოჩნდნენ. გასულ კვირას მათ გაფიცვაც გამართეს და განაცხადეს, რომ პროფესია სათანადო დაფინანსებასა და მხარდაჭერას საჭიროებს.

აქტივისტები და მშობელთა ორგანიზაციები აცხადებენ, რომ პრობლემა მხოლოდ პარიზს არ ეხება და მსგავსი გამოწვევები საფრანგეთის სხვა ქალაქებშიც არსებობს.

წყარო