მის სახლში იპოვეს 40 მლნ დოლარის ღირებულების ასობით ოქროს ზოდი, 2 მლნ ნაღდი ფული - დააკავეს CIA-ის ექსმაღალჩინოსანი

აშშ-ში ცენტრალური სადაზვერვო სააგენტოს ყოფილი მაღალჩინოსანი დააკავეს. FBI-ის აგენტებმა მის სახლში 40 მილიონ დოლარზე მეტი ღირებულების ასობით ოქროს ზოდი აღმოაჩინეს.

• სასამართლო დოკუმენტების მიხედვით, დაკავებული დევიდ რაში ბოლო თვეების განმავლობაში აშშ-ის მთავრობისგან სამუშაო ხარჯებისთვის დიდი ოდენობით ოქროსა და უცხოურ ვალუტას იღებდა. მოგვიანებით გამოძიებამ დაადგინა, რომ მიღებული აქტივების მნიშვნელოვანი ნაწილი ოფიციალურ ჩანაწერებში არ ფიქსირდებოდა.

FBI-ის ინფორმაციით, ჩხრეკისას აგენტებმა დაახლოებით 303 1-კილოგრამიანი ოქროს ზოდი, 2 მილიონი დოლარის ნაღდი ფული და 35 ძვირადღირებული საათი ამოიღეს.

დევიდ რაშს ბრალად ედება სახელმწიფო სახსრების მითვისება, ასევე სამსახურებრივი მონაცემების გაყალბება. გამოძიების ინფორმაციით, მან სახელმწიფო სამსახურში მუშაობის დროს განათლებისა და სამხედრო გამოცდილების შესახებ ცრუ ინფორმაცია წარადგინა და უკანონოდ იღებდა სამხედრო შვებულებასთან დაკავშირებულ ანაზღაურებას.

საქმის მასალების მიხედვით, რაშს უმაღლესი დონის საიდუმლო ინფორმაციაზე ჰქონდა წვდომა და მაღალი თანამდებობა ეკავა.

გამოძიება ამ დრომდე გრძელდება. ჯერჯერობით უცნობია, რატომ ინახავდა ყოფილი მაღალჩინოსანი ოქროს ზოდებსა და დიდძალ ფულს საკუთარ სახლში.

შენიშნვნა: მთავარი ფოტო AI

წყარო