დალურჯებული ხელები, რომელსაც ტრამპი ასპირინის მიღებით ხსნის და შეშუპებული კიდურები - პრეზიდენტის ჯანმრთელობა ახალ კითხვებს აჩენს
დონალდ ტრამპის ჯანმრთელობის მდგომარეობა კვლავ განხილვის საგანია, თუმცა თეთრ სახლს პრეზიდენტის უახლესი სამედიცინო შემოწმების სრული შედეგები ჯერ საჯაროდ არ გამოუქვეყნებია.
79 წლის ტრამპი ამ კვირაში ვოლტერ რიდის ეროვნულ სამხედრო სამედიცინო ცენტრში გეგმურ შემოწმებაზე მივიდა. ეს მისი მეორე ვადის განმავლობაში უკვე მესამე სამედიცინო ვიზიტია.
პრეზიდენტმა შემოწმების დასრულების შემდეგ სოციალურ ქსელში დაწერა, რომ „ყველაფერი იდეალურად იყო“ და ექიმებს მადლობა გადაუხადა, თუმცა დეტალური სამედიცინო ანგარიში ამ დრომდე არ გავრცელებულა.
- ამ ფონზე, ამერიკულ მედიასა და საზოგადოებაში კვლავ ჩნდება კითხვები პრეზიდენტის ჯანმრთელობის შესახებ. ბოლო თვეებში ტრამპი რამდენჯერმე გამოჩნდა დალურჯებული ხელებით, რასაც თეთრი სახლი ხშირი ხელის ჩამორთმევითა და ასპირინის ყოველდღიური მიღებით ხსნის.
ასევე გავრცელდა ინფორმაცია ფეხების შეშუპების შესახებ. თეთრი სახლის განცხადებით, ეს ქრონიკული ვენური უკმარისობითაა გამოწვეული — მდგომარეობით, რომელიც ასაკოვან ადამიანებში საკმაოდ ხშირია.
მედიაში განხილვის საგანი გახდა ტრამპის შესაძლო დაღლილობაც. ზოგიერთი ექიმი და პოლიტიკური კომენტატორი ამტკიცებს, რომ პრეზიდენტს საჯარო შეხვედრების დროს ჩაძინების ეპიზოდები ჰქონდა, თუმცა თავად ტრამპი ამ ბრალდებებს უარყოფს და ამბობს, რომ უბრალოდ „თვალებს ასვენებს“.
ამერიკული გამოკითხვების მიხედვით, საზოგადოების ნაწილი პრეზიდენტის ფიზიკურ და გონებრივ მდგომარეობაზე შეშფოთებას გამოხატავს. Washington Post-ის, ABC News-ისა და Ipsos-ის ბოლო კვლევის თანახმად, ამერიკელთა დაახლოებით 59 პროცენტი ფიქრობს, რომ ტრამპს პრეზიდენტისთვის საჭირო გონებრივი სიმკვეთრე აღარ აქვს, ხოლო 55 პროცენტი მიიჩნევს, რომ მისი ფიზიკური ჯანმრთელობაც საკმარისი არ არის.
- თუმცა პრეზიდენტის გარემოცვა ამ შეფასებებს არ ეთანხმება. თეთრი სახლის ექიმი, შონ ბარბაბელა, აცხადებს, რომ ტრამპი „საერთო ჯამში შესანიშნავ მდგომარეობაშია“.
ამასთან, პრეზიდენტის მხარდამჭერები ხშირად აღნიშნავენ, რომ თითქმის 80 წლის ასაკშიც კი ის ენერგიულად მუშაობს და აქტიურ პოლიტიკურ საქმიანობას აგრძელებს.
პრეზიდენტების ჯანმრთელობის შესახებ ინფორმაციის გამოქვეყნება აშშ-ში კანონით სავალდებულო არ არის, თუმცა მსგავსი საკითხები ხშირად პოლიტიკური განხილვის საგანი ხდება — განსაკუთრებით ასაკოვანი ლიდერების შემთხვევაში.