რევოლუცია პროსტატის კიბოს მკურნალობაში - მეცნიერებმა ახალი პრეპარატი შეიმუშავეს: რა ხდება ცნობილი
“მკურნალობის ახალი მეთოდის გამოცდის შემდეგ, პროსტატის კიბოს მაღალი რისკის მქონე მამაკაცებში, დაავადების დაბრუნების რისკი 29%-ით შემცირდა,“ – ამაზე PROTEUS-ის მასშტაბური საერთაშორისო კვლევის შედეგები მიუთითებს.
-
მეცნიერების თქმით, პრეპარატ აპალუტამიდის დამატება სტანდარტულ ჰორმონულ თერაპიასთან ერთად არა მხოლოდ აფერხებს კიბოს პროგრესირებას, არამედ ამცირებს მისი გავრცელების ალბათობასაც.
პროსტატის კიბოს დიაგნოზის მქონე პაციენტებისთვის ერთ-ერთი ყველაზე გავრცელებული მკურნალობა პროსტატის ამოკვეთის ოპერაციაა. თუმცა, შემთხვევათა თითქმის ნახევარში კიბო გარკვეული დროის შემდეგ კვლავ ბრუნდება, რაც ექიმებისა და პაციენტებისთვის სერიოზულ გამოწვევას წარმოადგენს.
დღემდე სტანდარტული მკურნალობა მოიცავს ანდროგენდეპრივაციულ თერაპიას (ADT) – მედიკამენტურ მკურნალობას, რომელიც ორგანიზმში ტესტოსტერონის გამომუშავებას ამცირებს. რადგან პროსტატის კიბოს მრავალი ტიპი სწორედ ამ ჰორმონზეა დამოკიდებული, მისი დონის შემცირება სიმსივნის ზრდის შენელებას ან შეჩერებას უწყობს ხელს.
- ახლა კი ამერიკელმა მკვლევრებმა დაადგინეს, რომ პრეპარატ აპალუტამიდის დამატება სტანდარტულ თერაპიასთან ერთად პაციენტებს უფრო ხანგრძლივი და ჯანმრთელი ცხოვრების შესაძლებლობას აძლევს. აპალუტამიდი, რომელიც Erleada-ს სახელითაც არის ცნობილი, ახალი თაობის პრეპარატებს მიეკუთვნება და სიმსივნურ უჯრედებს ტესტოსტერონის გამოყენების შესაძლებლობას უზღუდავს.
კვლევაში 18 ქვეყნის 2100-ზე მეტი მამაკაცი მონაწილეობდა. მათი საშუალო ასაკი 66 წელი იყო. ყველა პაციენტი ოპერაციამდე და ოპერაციის შემდეგ ექვსი თვის განმავლობაში იღებდა ანდროგენდეპრივაციულ თერაპიას. მონაწილეთა ნახევარს დამატებით აპალუტამიდი ენიშნებოდა, ხოლო მეორე ნახევარი პლაცებოს იღებდა.
ხუთწლიანი დაკვირვების შედეგად დადგინდა, რომ აპალუტამიდის მიმღებ პაციენტებში კიბოს დაბრუნების რისკი 29 პროცენტით ნაკლები იყო.
ახალი მკურნალობა დაახლოებით 20%-ით ამცირებს კიბოს სხვა ორგანოებში გავრცელების რისკსაც.
მეცნიერები ამჟამად იკვლევენ, რამდენ ხანს ნარჩუნდება მკურნალობის დადებითი ეფექტი და როგორ აისახება ის პაციენტების ცხოვრების ხარისხზე.
იხილეთ ასევე: