ნეფე პატარძალი წვეულების შემდეგ ავიაკატასტროფაში მოყვა - ქალი სასწაულებრივად გადარჩა, ნეფე კი დაიღუპა: ტრაგიკული ქორწილის დეტალები

აშშ-ის ჯორჯიის შტატში ახლადდაქორწინებული წყვილის ბედნიერება რამდენიმე წუთში ტრაგედიად გადაიქცა. 25 წლის დეივ ფიჯი საკუთარი ქორწილიდან გამგზავრების შემდეგ ვერტმფრენის ჩამოვარდნის შედეგად დაიღუპა, ხოლო მისი მეუღლე, ჯესნი, სასწაულებრივად გადარჩა.

• ტრაგიკული შემთხვევა პარასკევს ღამით, ჯორჯიის შტატის ქალაქ დოუსონვილის მახლობლად მოხდა. ფიჯისა და ჯესნის ქორწილს ასობით სტუმარი ესწრებოდა. ოჯახის წევრების თქმით, ცერემონია და საზეიმო მიღება იდეალურად წარიმართა.

"შეგვიძლია ვთქვათ, რომ ეს მართლაც იდეალური ქორწილი იყო. მეტს ვერაფერს ვისურვებდით“, - განაცხადა გარდაცვლილის მამამ ადგილობრივ მედიასთან საუბრისას.

• წყვილი საღამოს დაახლოებით 21:30 საათზე ვერტმფრენით უნდა გამგზავრებულიყო ატლანტაში, საიდანაც თაფლობის თვის მოგზაურობას დაიწყებდნენ. თუმცა, ფრენამდე გარკვეული შეფერხება ნისლიანმა ამინდმა გამოიწვია.

დეივ ფიჯი, რომელიც თავადაც პილოტი იყო, არსებული ხილვადობით შეშფოთებული ყოფილა. მისი მამის თქმით, ახალგაზრდა მამაკაცმა თავიდანვე გამოთქვა ეჭვი, რომ ასეთ პირობებში ფრენა უსაფრთხო არ იქნებოდა.

"მან თქვა, რომ თავად ასეთ ხილვადობაში არ გაფრინდებოდა“, - იხსენებს მამა.

მიუხედავად ამისა, მოგვიანებით წყვილმა და ვერტმფრენის პილოტმა მაინც გადაწყვიტეს წასვლა. აფრენიდან მალევე ვერტმფრენი ჩამოვარდა და ტყიან ტერიტორიაზე დაენარცხა. ავიაკატასტროფას დეივ ფიჯი და ვერტმფრენის პილოტი ემსხვერპლნენ.

გადარჩენილი ქალი მაშველების მისვლამდე დაახლოებით ხუთი საათის განმავლობაში ნანგრევებში იყო. საბოლოოდ, სამაშველო ჯგუფებმა მისი გამოყვანა შეძლეს.

მედიკოსების თქმით, ჯესნის არცერთი ძვალი არ აქვს მოტეხილი. მას მხოლოდ მრავლობითი დაჟეჟილობები და ჭრილობები აღენიშნება და, სავარაუდოდ, საავადმყოფოს უახლოეს დღეებში დატოვებს.

წყარო