კალიფორნიაში ბანკში თავდამსხმელი შეიჭრა და მძევლები აიყვანა - რა ვითარებაა ადგილზე და რას წერს მედია

სამხრეთ კალიფორნიის ქალაქ ბეიკერსფილდში, Chase Bank-ის შენობაში, მამაკაცი შეიჭრა და რამდენიმე ადამიანი მძევლად აიყვანა. ამ დროისთვის მძევლების ზუსტი რაოდენობა უცნობია, თუმცა პოლიციის ინფორმაციით, მოლაპარაკებების შედეგად ორი ადამიანი უკვე გათავისუფლებულია.

• ბეიკერსფილდის პოლიციის დეპარტამენტის განცხადებით, სამართალდამცავები შემთხვევის ადგილზე ბომბის საფრთხის შესახებ მიღებული შეტყობინების შემდეგ მივიდნენ. ადგილზე მისულმა ოფიცრებმა აღმოაჩინეს, რომ მამაკაცი შენობაში რამდენიმე მოქალაქესთან ერთად იყო ჩაკეტილი.

პოლიციის სერჟანტის, ერიკ სელედონის თქმით, მოლაპარაკებების შედეგად უკვე გათავისუფლებულია ორი ადამიანი, ხოლო შენობაში დარჩენილი პირები უსაფრთხოდ არიან და მათ ჯანმრთელობას საფრთხე არ ემუქრება.

"ჩვენ ყველა საჭირო რესურსი გვაქვს, რათა ეს სიტუაცია მაქსიმალურად უსაფრთხოდ დასრულდეს,“ - განაცხადა სელედონმა.

უსაფრთხოების ზომების ფარგლებში, მიმდებარე შენობების ევაკუაცია განხორციელდა, მათ შორის, მერიისა და პოლიციის შტაბ-ბინის. დროებით გადაიკეტა რამდენიმე ქუჩაც. სამართალდამცავებმა შემთხვევის ადგილისა და ახლომდებარე ობიექტების გარშემო უსაფრთხოების პერიმეტრი მოაწყვეს.

ცნობილია, რომ კრიზისული მოლაპარაკებების ჯგუფი ეჭვმიტანილს ტელეფონით უკავშირდება. შემთხვევის ადგილზე მობილიზებულია პოლიციის სპეციალური დანაყოფები, სასწრაფო დახმარების ეკიპაჟები და FBI-ის აგენტები.

ბეიკერსფილდის მერმა, კარენ გოჰმა, მოსახლეობას სიმშვიდისკენ მოუწოდა და აღნიშნა, რომ სამართალდამცავებსა და სხვა სპეციალისტებს უნდა მიეცეთ შესაძლებლობა, სიტუაცია უსაფრთხოდ და პროფესიონალურად მართონ.

მომხდარის შესახებ დამატებითი დეტალები ამ დროისთვის უცნობია. მოლაპარაკებები გრძელდება.

წყარო