"შესაძლოა, ასეთი ფორმით იყოს წარმოდგენილი" - თუკი უცხოპლანეტელები არსებობენ, როგორ შეიძლება გამოიყურებოდნენ ისინი? მეცნიერული ახსნა
მეცნიერების ნაწილი ფიქრობს, რომ სხვა პლანეტებზე სიცოცხლის შესახებ პასუხების მოსაძებნად შორს წასვლა საჭირო არ არის - ამისთვის საუკეთესო ადგილი თავად დედამიწაა.
მკვლევრები დღეს ჩვენს პლანეტაზე არსებულ ყველაზე გამძლე და უჩვეულო ორგანიზმებს სწავლობენ, რათა გაიგონ, როგორ შეიძლება არსებობდეს სიცოცხლე კოსმოსის ექსტრემალურ გარემოში.
-
განსაკუთრებით დიდ ინტერესს იწვევს ე.წ. ექსტრემოფილები - მიკროორგანიზმები, რომლებიც გადარჩენას ახერხებენ ისეთ პირობებში, სადაც სიცოცხლე თითქმის შეუძლებელია.
მეცნიერებმა აღმოაჩინეს, რომ მიკრობები ოკეანის სიღრმეებში, მარილიან ტბებში, პოლარული ყინულის ქვეშ და ატმოსფეროს ზედა ფენებშიც კი ცხოვრობენ. სწორედ ამიტომ, ბევრი მკვლევარი ვარაუდობს, რომ თუ არამიწიერი სიცოცხლე არსებობს, ის შესაძლოა სწორედ ასეთი მიკრობული ფორმით იყოს წარმოდგენილი.
- სპეციალისტები ლაბორატორიებში მარსისა და სხვა პლანეტების მსგავსი პირობების შექმნას ცდილობენ, რათა დაადგინონ, რა პირობებში შეუძლია სიცოცხლეს არსებობა და როგორ კვალს ტოვებს ის გარემოში. მათი თქმით, უცხოპლანეტური სიცოცხლე შესაძლოა თვალსაჩინო ორგანიზმების ნაცვლად მხოლოდ ქიმიური ან ბიოლოგიური ნიშნებით გამოვლინდეს.
მეცნიერებს აინტერესებთ არა მხოლოდ ის, როგორ შეიძლება გამოიყურებოდნენ უცხოპლანეტელები, არამედ ისიც, როგორ შევძლებთ მათთან კომუნიკაციას. ამ მიზნით ისინი დედამიწის ინტელექტუალურ ცხოველებს, განსაკუთრებით კი კაშალოტებსა და დელფინებს სწავლობენ.
კვლევების ავტორები აღნიშნავენ, რომ თუ ოდესმე სხვა ცივილიზაციას შევხვდებით, მათი ენა და კომუნიკაციის ფორმა შესაძლოა, ადამიანისას საერთოდ არ ჰგავდეს. ამიტომ ცხოველთა კომუნიკაციის შესწავლა მომავალში უცხოპლანეტელებთან ურთიერთობის გასაღებიც შეიძლება გახდეს.
მეცნიერების აზრით, არამიწიერი სიცოცხლის აღმოჩენა ერთ-ერთი ყველაზე მნიშვნელოვანი მოვლენა იქნება კაცობრიობის ისტორიაში. ამან შესაძლოა სრულიად შეცვალოს ჩვენი წარმოდგენა სამყაროსა და მასში ადამიანის ადგილის შესახებ.