კიმ ჩენ ინი ჩრდილოეთ კორეელ ქალ ფეხბურთელებს შეხვდა, რომლებმაც მისი დანახვისას "სიხარულის ცრემლები ვერ შეიკავეს"

ჩრდილოეთ კორეის ლიდერმა, კიმ ჩენ ინმა, მიმდინარე კვირის დასაწყისში ფხენიანში პირადად მიიღო ქალთა შორის AFC-ის ჩემპიონთა ლიგის გამარჯვებული გუნდი. იგი ფეხბურთელებს გადაეხვია და მათთან ერთად ფოტოებიც გადაიღო, რასაც სპორტსმენების მხრიდან სიხარულის ცრემლები და ემოციური ოვაციები მოჰყვა.

• ნეგოჰიანგის“ (Naegohyang) ქალთა საფეხბურთო კლუბმა აზიის უძლიერესი გუნდის ტიტული 23 მაისს, სუვონში გამართულ ფინალში მოიპოვა, სადაც იაპონური “ტოკიო ვერდი ბელეზა“ (Tokyo Verdy Beleza) ანგარიშით 1-0 დაამარცხა. ამ გამარჯვებით ისინი პირველი ჩრდილოეთკორეული გუნდი გახდა, რომელმაც AFC-ის ქალთა ჩემპიონთა ლიგის მოგება შეძლო.

სახელმწიფო მედიის ცნობით, კიმ ჩენ ინმა ფეხბურთელებს ეს ისტორიული მიღწევა პირადად მიულოცა და მოგვიანებით “ნეგოჰიანგისა“ და 17 წლამდე ქალთა ეროვნულ ნაკრებს შორის გამართულ ამხანაგურ მატჩსაც დაესწრო.

APT News-ის მიერ გავრცელებულ კადრებში ჩანს, რომ მიღებას საზოგადოების წარმომადგენლები და მმართველი პარტიის ათობით ოფიციალური პირი ესწრებოდა, რომლებიც გამარჯვებულებს ტაშითა და ქვეყნის მინიატურული დროშების ფრიალით ხვდებოდნენ.

აღსანიშნავია, რომ ჩემპიონატში მონაწილეობის მისაღებად “ნეგოჰიანგს“ სამხრეთ კორეაში მოუწია გამგზავრება. 2014 წლის “ინჩხონის“ აზიური თამაშების შემდეგ ეს პირველი შემთხვევა იყო, როდესაც ჩრდილოეთკორეელმა ფეხბურთელებმა მეზობელ ქვეყანაში იმოგზაურეს.

წყარო