ლაბორატორიული ალმასების ინდუსტრია ბაზარს იპყრობს, რის გამოც ბუნებრივი ალმასების ფასი შემცირდა - როგორ გამოჰყავთ “ბრილიანტი“, რომელსაც ორიგინალისგან ვერ გაარჩევთ
ლაბორატორიულ პირობებში გამოყვანილი ალმასების მზარდმა პოპულარობამ ბუნებრივი ძვირფასი ქვების ფასების მკვეთრი ვარდნა გამოიწვია, რის გამოც სიერა-ლეონეში ქვეყნის უმსხვილესი ალმასის საბადო დაიხურა.
მას შემდეგ, რაც გასულ წელს Koidu Holdings-ის საბადო დაიხურა, კონოს ოლქში არაფორმალური მოპოვებით დაკავებულთა რიცხვი საგრძნობლად გაიზარდა. ქვეყნის უდიდესმა შახტამ მუშაობა შეაჩერა ხელფასების გამო დაწყებული მწვავე შრომითი კონფლიქტის შემდეგ, რის შედეგადაც დაახლოებით ათასი ადამიანი სამსახურის გარეშე დარჩა. ოფიციალურად კომპანიამ დახურვა გაფიცვასთან დაკავშირებული ხარჯებითა და უსაფრთხოების პრობლემებით ახსნა, თუმცა დარგის წყაროები აღიარებენ, რომ როლი ალმასების მსოფლიო ბაზრის სისუსტემაც ითამაშა.
-
ბოლო ოთხი წლის განმავლობაში ბუნებრივი დამუშავებული ალმასების საცალო ფასები დაახლოებით 40%-ით შემცირდა.
მთავარი ფაქტორი გახდა ე.წ. ლაბორატორიული ალმასების წარმოების ინდუსტრიის სწრაფი ზრდა. ეს ქვები იქმნება კრისტალიზებული ნახშირბადისგან და ქიმიური და ფიზიკური თვალსაზრისით პრაქტიკულად არ განსხვავდება ბუნებრივი ალმასებისგან. მათი უმეტესობა იწარმოება ინდოეთსა და ჩინეთში HPHT (მაღალი წნევა და მაღალი ტემპერატურა) და CVD (ქიმიური დალექვა აირადი ფაზიდან) ტექნოლოგიების გამოყენებით.
ამასთან, მათი ღირებულება შესაძლოა 70%-ით დაბალი იყოს ბუნებრივ ანალოგებზე. კონოს ოლქის გუბერნატორი ოგასტინ შეკო აღნიშნავს, რომ მსოფლიო ფასების ვარდნამ განსაკუთრებით მძიმედ დაარტყა რეგიონს ბოლო ხუთი წლის განმავლობაში, რამაც შეამცირა მაღაროელების შემოსავლები, შეზღუდა ინვესტიციები და დაასუსტა ადგილობრივი ეკონომიკური აქტივობა.
-
ლაბორატორიული ალმასების ბაზარმა გასულ წელს 29,5 მილიარდ დოლარს მიაღწია, ხოლო 2034 წლისთვის შესაძლოა 91,9 მილიარდ დოლარამდე გაიზარდოს.
აშშ-ში ნიშნობის ბეჭდების გაყიდვების 61% სწორედ ლაბორატორიულ ქვებზე მოდის. იუველირი დაგ მედოუზი ატლანტადან ამბობს, რომ ადამიანებს სურთ მაქსიმალურად ეფექტური სამკაული თავიანთი ბიუჯეტით — ახლა, როდესაც ოქრო 4500–5000 დოლარამდე გაძვირდა, ბეჭდის ოქროს ნაწილი უფრო ძვირი ხდება, ალმასი კი - უფრო იაფი.
იხილეთ ასევე: