ნგრევა, მსხვერპლი და პანიკა - 6.7 მაგნიტუდის სიმძლავრის მიწისძვრამ ინდონეზიაში შენობები, ხიდები და გზა გაანადგურა: განხორციელდა ევაკუაცია (ფოტო/ვიდეო)

სამშაბათს, 16 ივნისს, ინდონეზიის კუნძულ სულავესის ცენტრალურ ნაწილში ძლიერი მიწისძვრა მოხდა. ოფიციალური პირების ინფორმაციით, სტიქიას მინიმუმ ერთი ადამიანი ემსხვერპლა, ათობით დაშავდა, დაზიანდა სახლები და ინფრასტრუქტურა.

6.7 მაგნიტუდის სიმძლავრის ბიძგებმა განსაკუთრებული პანიკა გამოიწვია ქალაქ პალუში, რომელიც რვა წლის წინ მომხდარმა დამანგრეველმა მიწისძვრამ თითქმის სრულად გაანადგურა.

• ევაკუაცია და დაშავებულები

მიწისძვრის ეპიცენტრი ქალაქ პალუდან სამხრეთ-აღმოსავლეთით 43 კილომეტრში, 10 კილომეტრის სიღრმეზე მდებარეობდა. ძლიერი რყევა ერთ წუთზე მეტხანს გაგრძელდა. 400 000-იან ქალაქში პანიკაში ჩავარდნილი ადამიანები შენობებიდან ღია სივრცეებში გარბოდნენ. უსაფრთხოების მიზნით, რამდენიმე საავადმყოფოდან პაციენტების ევაკუაცია პირდაპირ ქუჩაში გახდა საჭირო.

კატასტროფების მართვის ეროვნული სააგენტოს სპიკერის, აბდულ მუჰარის განცხადებით, სულ მცირე 312 ადამიანი იძულებული გახდა საცხოვრებელი ადგილი დაეტოვებინა.

სტიქიის შედეგად 38 პირი დაშავდა, მათ შორის 13 მძიმე მდგომარეობაშია.

• მასშტაბური ნგრევა და ჩაკეტილი გზები

სტიქიამ მნიშვნელოვანი ზიანი მიაყენა რეგიონის ინფრასტრუქტურას. წინასწარი მონაცემებით:

1. განადგურდა ან დაზიანდა 67 საცხოვრებელი სახლი;
2. დაზიანდა 6 სალოცავი და 4 საზოგადოებრივი ობიექტი;
3. ჩაინგრა 2 ხიდი;
4. დაზიანდა სამთავრობო და ბიზნეს შენობები.

განსაკუთრებით მძიმე ვითარებაა ტრანსპორტის მხრივ - მეწყერისა და ნგრევის გამო ჩაიხერგა პროვინციული მნიშვნელობის გზა, რომელიც ქალაქ პალუს სიგისა და პოსოს რეგიონებთან აკავშირებდა.

დღის განმავლობაში რეგიონში 71-ზე მეტი განმეორებითი ბიძგი (აფტერშოკი) დაფიქსირდა. მიუხედავად იმისა, რომ სეისმოლოგების განცხადებით ცუნამის საფრთხე არ არსებობს, მოსახლეობამ პრევენციის მიზნით მაინც დატოვა სანაპირო ზოლის სიახლოვეს მდებარე სახლები.

“რყევა საშინლად ძლიერი იყო. ჩვენ კვლავ ტრავმირებულები ვართ წინა მიწისძვრის გამო, ამიტომ ქუჩაში დარჩენა ვარჩიეთ“, - ამბობს პალუს მცხოვრები მუხტარ აჰმადი.

• აღსანიშნავია, რომ 2018 წელს პალუში 7.5 მაგნიტუდის მიწისძვრას 3-მეტრიანი ცუნამი და ნიადაგის გათხევადება მოჰყვა, რასაც 4000-ზე მეტი ადამიანის სიცოცხლე ემსხვერპლა.

ინდონეზია, რომელიც 17 000-ზე მეტი კუნძულისგან შედგება, ე.წ. “ცეცხლოვან რკალში“ მდებარეობს, რის გამოც ქვეყანა ხშირად ხდება მიწისძვრებისა და ვულკანური აქტივობების მსხვერპლი.

წყარო