"ლილო და სტიჩის" მსახიობი, ჰოლივუდის ვარსკვლავი, 35 წლის ასაკში გარდაიცვალა - "ის უმძიმეს მდგომარეობაში იყო"
ამერიკელი მსახიობი დეივი ჩეისი, რომელიც მაყურებელმა საშინელებათა ფილმ "ზარი“ (The Ring) სამარა მორგანის როლით გაიცნო, 35 წლის ასაკში გარდაიცვალა.
- ინფორმაცია მედიას ჩეისის მენეჯერმა, ჯონ რაიანმა დაუდასტურა. მისი თქმით, მსახიობი ლოს-ანჯელესის საავადმყოფოში მენინგიტის გართულების შედეგად განვითარებული სეფსისით გარდაიცვალა. რაიანის ინფორმაციით, ჩეისი მანამდე არასრულფასოვანი კვების გამო იყო ჰოსპიტალიზებული.
მსახიობის მენეჯერის, ჯონ რაიანის თქმით, გარდაცვალებამდე რამდენიმე თვით ადრე ჩეისი მძიმე მდგომარეობაში ცხოვრობდა. ახლობლები და მეგობრები მის პოვნას და დახმარებას ცდილობდნენ.
რაიანის მტკიცებით, მან და ჩეისის ნახევარდამ, გაია ბრაუნმა, დაახლოებით ერთი წლის წინ კერძო დეტექტივსაც მიმართეს, რათა მსახიობის ადგილსამყოფელი დაედგინათ და მისთვის დახმარება აღმოეჩინათ. მისი თქმით, ჩეისთან კონტაქტი გარკვეული დროით საერთოდ გაწყდა.
- 2025 წლის ბოლოს მათ მიაწოდეს ვიდეო, სადაც, სავარაუდოდ, ჩეისი ლოს-ანჯელესის სკიდ როუზე მძიმე პირობებში იყო ნაჩვენები. ვიდეოში ის ძლივს იჯდა მიწაზე, კარავთან ან დროებით თავშესაფართან ახლოს. რაიანმა შეძლო მსახიობთან ტელეფონით დაკავშირება, თუმცა როცა ის ადგილზე მივიდა, ჩეისი იქ აღარ დახვდა.
რაიანისა და ოჯახის წევრების თქმით, დაგეგმილი იყო მისი რეაბილიტაციის ცენტრში გადაყვანა, სადაც მკურნალობის გაგრძელებას შეძლებდა. საბოლოოდ, საავადმყოფოში მენინგიტის გართულებით მოხვდა.
დეივი ჩეისმა კარიერა ბავშვობაში დაიწყო. იგი პირველად სცენაზე 4 წლის ასაკში გამოჩნდა, ხოლო პირველი სატელევიზიო როლი 7 წლისამ მიიღო პოპულარულ სიტკომში "საბრინა, მოზარდი ჯადოქარი“.
მისი ერთ-ერთი პირველი მნიშვნელოვანი როლი 2001 წლის საკულტო ფილმში "დონი დარკო“ იყო, სადაც სამანტამ დარკოს პერსონაჟი განასახიერა. თუმცა მსოფლიო პოპულარობა 2002 წელს მოიპოვა, როდესაც ფილმ "ზარში“ სამარა მორგანის როლი შეასრულა - ამ როლისთვის მან 2003 წელს MTV-ის კინოდაჯილდოებაზე საუკეთესო ბოროტმოქმედის ჯილდო მიიღო.
იმავე წელს ჩეისმა კიდევ ერთი გამორჩეული პერსონაჟი გაახმოვანა - ლილო დისნეის პოპულარულ ანიმაციურ ფილმში "ლილო და სტიჩი“. ამ ნამუშევრისთვის მან Annie Awards-ის ჯილდო მიიღო.
მსახიობის კარიერაში ასევე იყო როლები სერიალებში „მომხიბვლელი“ (Charmed), „სასწრაფო დახმარება“ (ER) და „ანგელოზის შეხება“ (Touched by an Angel). მოგვიანებით იგი HBO-ს სერიალ „დიდ სიყვარულშიც“ (Big Love) გამოჩნდა, სადაც რონდა ვოლმერის როლს ასრულებდა.
ჯონ რაიანის თქმით, ჩეისი წლების განმავლობაში ერიდებოდა ჰოლივუდურ ცხოვრებას და დიდ სტუდიურ პროექტებს ხშირად დამოუკიდებელ ფილმებს ამჯობინებდა. "მას დიდება არ იზიდავდა. უფრო მეტად უყვარდა მშვიდი ცხოვრება და კატებთან დროის გატარება“, - აღნიშნა მან.
"The Hollywood Reporter“-ის ცნობით, ჩეისი სიცოცხლის ბოლო წლებში ნარკოდამოკიდებულებას ებრძოდა.