არგენტინელმა ტელეწამყვანმა პირდაპირ ეთერში გამოაცხადა, რომ მესის მამა გარდაიცვალა - ინფორმაცია ყალბი აღმოჩნდა და წამყვანმა სამსახური დატოვა: "ვწუხვარ, რომ ასეთი ტკივილის მიზეზი გავხდი"

არგენტინელმა ტელეწამყვანმა, რომელმაც ლიონელ მესის მამის შესახებ ცრუ ინფორმაცია გაავრცელა, საჯაროდ მოიხადა ბოდიში და სამსახური დატოვა.

• Luzu TV-ის გადაცემაში El Show del Verano წამყვანმა ფლორენსია პენიამ პირდაპირ ეთერში განაცხადა, რომ ლიონელ მესის მამა, ხორხე მესი, გარდაიცვალა. მოგვიანებით კი დაამატა, რომ ამ ამბის გამო ფეხბურთელს მსოფლიო ჩემპიონატის მატჩების გამოტოვება მოუწევდა.

მალევე გაირკვა, რომ ეს ცრუ ინფორმაცია იყო. მესის ოჯახმა ოფიციალურადაც განაცხადა, რომ ხორხე მესი ცოცხალია, თუმცა ჯანმრთელობის პრობლემები აქვს და ექიმების მეთვალყურეობის ქვეშაა.

შემთხვევის შემდეგ ფლორენსია პენიამ საჯაროდ მოიხადა ბოდიში და აღნიშნა: "ბოდიშს ვუხდი მესის ოჯახს იმ საშინელი მომენტისთვის. ძალიან მრცხვენია, რომ ამ ტკივილის მიზეზი ვიყავი“.

მისივე განმარტებით, ინფორმაცია პირდაპირ ეთერში მიაწოდეს და მან ის გადაუმოწმებლად გააჟღერა: "ეს ცრუ ინფორმაცია პირდაპირ ეთერში მომაწოდეს… და მე მას ვენდე“.

არხმაც ოფიციალური განცხადება გაავრცელა: "ღრმად ვწუხვართ გადაცემის ეთერში მომხდარი ინციდენტის გამო. ჩვენი არხისთვის, სათანადო წინასწარი გადამოწმების გარეშე მგრძნობიარე ინფორმაციის გადაცემა მიუღებელია“.

მესის ოჯახმა საზოგადოებას მოუწოდა, თავი შეიკავონ დაუდასტურებელი ინფორმაციის გავრცელებისგან და განაცხადეს: "ნებისმიერი ვერსია, განცხადება ან ინფორმაცია, რომელიც არ მოდის თავად ოჯახიდან, არ უნდა ჩაითვალოს სიმართლედ“.

წყარო