"ნაცვლად პერსონაჟის "მოკვლისა", შეცვალეს მსახიობი" - ცნობილი თურქ ვარსკვლავებს ნარკოსკანდალის გამო პოპულარული სერიალებიდან ხსნიან: ვის ემუქრება პატიმრობა
თურქეთში შოუბიზნესის ვარსკვლავების მასშტაბური დაკავებები ანტინარკოტიკული ოპერაცია "განთიადის" ფარგლებში მიმდინარეობს. საქმესთან დაკავშირებით უკვე დაკავებულია 250-ზე მეტი ადამიანი.
გამოძიება 2025 წლის ოქტომბერში დაიწყო და დღემდე გრძელდება. მასშტაბური რეიდები სტამბოლის ელიტური ღამის კლუბების ჩხრეკით დაიწყო. გამოძიებამ დაადგინა, რომ აკრძალული ნივთიერებები მასიურად მიეწოდებოდა ბოჰემურ წვეულებებს, რომლებიც ვილებსა და იახტებზე იმართებოდა.
თურქეთის კანონმდებლობა უკიდურესად მკაცრია. ნივთიერებების შეძენა, შენახვა ან მოხმარება მინიმალური დოზითაც კი, პირადი მოხმარების მიზნით, ითვალისწინებს 2-დან 5 წლამდე პატიმრობას. უკანონო წარმოების, იმპორტის, ექსპორტის ან გაყიდვისთვის 10-დან 20 წლამდე პატიმრობაა გათვალისწინებული, ხოლო სადისტრიბუციო ქსელის შექმნა ან დაფინანსება ისჯება 20-დან 30 წლამდე თავისუფლების აღკვეთით.
მარტში სტამბოლის მთავარმა პროკურატურამ რამდენიმე ვარსკვლავის დაპატიმრების ორდერი გასცა. ეჭვმიტანილთა სიაში ჰანდე ერჩელთან ერთად აღმოჩნდა მისი ყოფილი შეყვარებული, მილიარდერი ჰაკან საბანჯი და მისი ძმა ქერიმიც. იმ მომენტში მსახიობი ლონდონში სწავლობდა, საიდანაც განაცხადა, რომ მზად იყო დაბრუნებულიყო და გამოძიებასთან ეთანამშრომლა. თურქეთში დაბრუნების შემდეგ მსახიობი აეროპორტში დააკავეს. მან ბიოლოგიური ნიმუშები ჩააბარა. სისხლისა და თმის ანალიზებმა უარყოფითი შედეგი აჩვენა, თუმცა შარდში ნივთიერებების კვალი დაფიქსირდა. მსახიობის დაცვამ ეს ფაქტი ლეგალური სამედიცინო პრეპარატების - ტკივილგამაყუჩებლებისა და ხველის საწინააღმდეგო საშუალებების მიღებით განმარტა.
პროკურატურამ და სასამართლომ მსახიობს ბრალდებები მოუხსნეს და ოფიციალურად დაადასტურეს მისი უდანაშაულობა. საქმის დახურვისთანავე, რეპუტაცია სრულად აღდგენილმა ჰანდე ერჩელმა კანის 79-ე კინოფესახვალზე გაემგზავრა საიუველირო ბრენდის ელჩის რანგში და წითელი ხალიჩის ერთ-ერთი მთავარი ვარსკვლავი გახდა.
ბურაქ დენიზი - აპრილში, სხვა ცნობილ სახეებთან ერთად, დარტყმის ქვეშ მოექცა და საქმის ერთ-ერთ მთავარ ფიგურანტად დასახელდა. მსახიობის სახლში ჩხრეკისას აღმოაჩინეს აკრძალული ნივთიერებები, თუმცა მცირე რაოდენობით.
ბურაქი დაუყოვნებლივ დააკავეს და დაკითხვისთვის ჟანდარმერიაში გადაიყვანეს. პროკურატურა მკაცრ სასჯელს ითხოვდა. სასამართლომ გადაწყვეტილება გამოიტანა: მსახიობი გაათავისუფლეს, მაგრამ სასამართლო კონტროლის ქვეშ, პოლიციის განყოფილებაში რეგულარულად გამოცხადების ვალდებულებით. მოგვიანებით მოვიდა ექსპერტიზის შედეგებიც. ოფიციალურად დადასტურდა, რომ მსახიობის ბიოლოგიურმა ტესტებმა დადებითი შედეგი აჩვენა ერთდროულად ორი ტიპის აკრძალულ ნივთიერებაზე.
ყველა გარემოება საქმეს სისხლის სამართლის დევნის კატეგორიაში გადაიყვანს მუხლით: „მოხმარება და შენახვა“. მსახიობის დაცვა ამჟამად ცდილობს დაამტკიცოს, რომ ნივთიერების მოცულობა მხოლოდ „პირადი მოხმარებისთვის“ იყო, რაც თურქეთში პირველი დარღვევისას ითვალისწინებს იძულებით მკურნალობას ან განაჩენის გადავადებას.
სასამართლო კონტროლის გამო, არტისტს საერთაშორისო მოგზაურობები შეზღუდული აქვს, ხოლო მისი სარეკლამო კონტრაქტები სასამართლოს საბოლოო განაჩენამდე დროებით გაყინულია. ბურაქ დენიზის კარიერა ამჟამად ღრმა კრიზისშია.
სკანდალურ სერიალ „წითელ ქამარში“ ფათიჰ უნალის როლის შემსრულებელი იანვრის მასშტაბურ რეიდში მოყვა. პოლიციის მიერ ჩხრეკის ჩატარების შემდეგ, დოღუკან გიუნგერი დააკავეს და სტამბოლის პოლიციაში გადაიყვანეს. ვარსკვლავის ბიოლოგიურმა ტესტებმა ნარკოტიკებზე დადებითი შედეგი აჩვენა. მსახიობმა არ იუარა და აღიარა მოხმარების ფაქტი.
ტელეარხ Show TV-ის ხელმძღვანელობამ და საპროდიუსერო კომპანია Gold Film-მა სასამართლოს არ დაელოდნენ. უზარმაზარი რეპუტაციული რისკების გამო ვარსკვლავთან კონტრაქტი ცალმხრივად შეწყდა. პერსონაჟი ფათიჰი სერიალის სიუჟეტის ცენტრალური ფიგურა იყო, ამიტომ პროდიუსერებს სასწრაფოდ მოუწიათ გადაწყვეტილების მიღება. ნაცვლად პერსონაჟის „მოკვლისა“, შემქმნელებმა მის შემცვლელად მსახიობი ემრე დინლერი აიყვანეს.
დოღუკანმა სოციალურ ქსელში საჯაროდ მოინანია და აღიარა, რომ უზარმაზარი შეცდომა დაუშვა, რომლის გამოსწორებასაც ცდილობს. თუმცა განაცხადა, რომ სერიალის პროდიუსერების გადაწყვეტილებას კატეგორიულად არ ეთანხმება.
„ყველა იმსახურებს მეორე შანსს. მე ამ უმოწყალო ადამიანებს და კომპანიებს, რომლებსაც არ სჯერათ, მათ სინდისზე ვტოვებ და ალაჰს მივმართავ. თუმცა, ასევე მინდა საჯაროდ განვაცხადო, რომ მყარად ვდგავარ ფეხზე და საკუთარი თავისთვის მიცემული პირობისამებრ, ვაგრძელებ სუფთა ცხოვრებას. ძალიან მალე კვლავ თქვენთან, ჩემს გულშემატკივრებთან ერთად ვიქნები უკეთეს პროექტებში“, - დაწერა მან სოციალურ ქსელში.
იბრაჰიმ ჩელიქქოლი სერიალ „შავ-თეთრი სიყვარულის“ მთავარი როლის შემსრულებელი გაზაფხულზე საკუთარ სახლში დააკავეს. მაშინ მასთან ერთად საქმეში ფიგურირებდნენ თურქეთის ტოპ-პოპ-შემსრულებლებიც. მსახიობმა გაიარა სავალდებულო სამედიცინო შემოწმება და ჩვენების მისაცემად განყოფილებაში გადაიყვანეს.
იბრაჰიმ ჩელიქქოლის ანალიზების შედეგები აკრძალულ ნივთიერებებზე დადებითი აღმოჩნდა. მიუხედავად იმისა, რომ მსახიობის სისხლი სუფთა იყო, მისი თმის ნიმუშებში ექსპერტებმა ნარკოტიკების კვალი აღმოაჩინეს.
დადებითი ტესტის მიუხედავად, პროკურატურამ ჩელიქქოლი სასამართლო კონტროლის გარეშე გაათავისუფლა. თურქულ სამართალში მუხლისთვის „მოხმარება“, როდესაც სისხლის მიმდინარე ანალიზები სუფთაა და სახლში შენახვის პირდაპირი მტკიცებულებები არ არსებობს, ხშირად გამოიყენება სამედიცინო და ფსიქოლოგიური კონტროლის პროგრამა ან განაჩენის გადავადება.
ეს ინფორმაცია სრული მოულოდნელობა იყო თურქი ვარსკვლავის ყველა გულშემატკივრისთვის. თავად იბრაჰიმმა საჯარო განცხადებებზე და პრესისთვის კომენტარების მიცემაზე უარი განაცხადა.
იბრაჰიმ ჩელიქქოლის პარტნიორი ბირჯე აქალაი სერიალ „შავ-თეთრი სიყვარულიდან“ სხვა ცნობილ ადამიანებთან ერთად ოპერატიულად გადაიყვანეს დაკითხვაზე. მსახიობს დაავალეს ანალიზების ჩაბარება და სახლში გაუშვეს დეტალების გარკვევამდე.
სოციალურ ქსელში თაყვანისმცემლების დამშვიდება იჩქარა და ხაზი გაუსვა, რომ ყველაფერი რიგზე ჰქონდა, ასევე პრესასთან საუბარში განაცხადა, რომ ცხოვრებაში არაფერი დაუშავებია ისეთი, რის გამოც თავდახრილი ივლიდა. ბევრისთვის შოკისმომგვრელი აღმოჩნდა ის ფაქტი, რომ ტესტის შედეგი დადებითი იყო. სისხლისა და თმის ლაბორატორიულმა ანალიზებმა მის ორგანიზმში აკრძალული ნივთიერებების არსებობა გამოავლინა. აქალაიმ გამოქვეყნებული სიები პირდაპირ საფეხბურთო მატჩზე დასწრებისას იხილა და შოკირებულმა დატოვა ტრიბუნა. მისი რეაქციის კადრები ქსელში გავრცელდა.
ნარკოტიკებთან დაკავშირებული სკანდალის გარდა, ვარსკვლავი საჭესთან ნასვამ მდგომარეობაშიც დააფიქსირეს, რამაც მისი მდგომარეობა დაამძიმა.
მსახიობმა და მისმა ადვოკატებმა დაუყოვნებლივ გააკეთეს ოფიციალური განცხადება. მათ განმარტეს, რომ აღმოჩენილი ქიმიური ნაერთები ლეგალური სამედიცინო პრეპარატების - ძლიერი ანტიდეპრესანტებისა და ტკივილგამაყუჩებლების კვალია, რომლებსაც ბირჯე მკაცრად ექიმის დანიშნულებით იღებს.
სკანდალის ფონზე ბირჯემ ნამდვილი „წმენდა“ მოაწყო სოციალურ ქსელებში. მან დემონსტრაციულად გააუქმა გამოწერა თავისი ახლო მეგობრისა და კოლეგის, იბრაჰიმ ჩელიქქოლის, ასევე ასლი ენვერისა და ნურ ფეთაჰოღლუს გვერდებთან. მეგობრებმა მას საჯარო მხარდაჭერა არ გამოუცხადეს, როცა მისი ანალიზების შედეგები ინტერნეტში გავრცელდა.
ამ დროისთვის მსახიობს რეალური პატიმრობა არ ემუქრება, თუმცა ის სამართალდამცავი ორგანოების მჭიდრო კონტროლის ქვეშ იმყოფება. ალკოჰოლთან ან ნარკოტიკებთან დაკავშირებულმა განმეორებითმა ინციდენტებმა შესაძლოა ზომების გამკაცრება გამოიწვიოს.
იანვარში თურქი სექს-სიმბოლო ჯან იამანი სტამბოლის ლეგენდარულ ხუთვარსკვლავიან Bebek Hotel-ში ისვენებდა, როდესაც იქ ათობით პოლიციელი ძაღლებთან ერთად შეიჭრა ელიტური დაწესებულებების ტოტალური ჩხრეკის ფარგლებში. ხმების თანახმად, სამართალდამცავებმა მუშაობა მას შემდეგ დაიწყეს, რაც სასტუმროში მსახიობი მივიდა. ჯან იამანი დააკავეს და პოლიციაში გადაიყვანეს. „ნაადრევი ფრინველის“ ვარსკვლავს ტესტების ჩაბარება დაავალეს.
ჯან იამანის სისხლის პირველადმა სამედიცინო ანალიზებმა უარყოფითი შედეგი აჩვენა. თმის დამატებითი ტესტების შედეგებს არ დაელოდა, იამანმა სასწრაფოდ დატოვა თურქეთი და რომში გაფრინდა. უკვე იტალიიდან მან დუმილი დაარღვია და სოციალურ ქსელში პოსტი გამოაქვეყნა:
„ნუთუ მართლა გჯერათ, რომ კლუბებში ნარკოტიკებით ვერთობი მაშინ, როცა პოლიცია მასშტაბურ რეიდებს ატარებს? მე უსაფუძვლო ბრალდებების მსხვერპლი გავხდი. განყოფილებაში ჩემთან არაფერი უპოვიათ და მაშინვე გამათავისუფლეს“, - განაცხადა მან.
იმის გამო, რომ მსახიობი მუდმივად საზღვარგარეთ ცხოვრობს და საერთაშორისო ვარსკვლავის სტატუსი აქვს, თურქეთის პროკურატურას არ გაუცია მისი იძულებით დაბრუნების ორდერი განმეორებითი ექსპერტიზებისთვის და თვალი დახუჭა ინციდენტზე სუფთა ექსპრეს-ტესტების შემდეგ. თავად მსახიობმა მოგვიანებით სან-რემოს ფესტივალზე სცენიდან დასცინა ყველაფერს, რაც მოხდა.
სერიალ „დიდებული საუკუნე: ქოსემ სულთნის“ მთავარი როლის შემსრულებელი ბერენ საათი ივნისში დააკავეს. ოპერაცია შეეხო ბერენ საათსა და მის მეუღლეს - ცნობილ თურქ პოპ-მომღერალ ქენან დოღულუს. მათთან ერთად დაკავებული იყო მისი ძმა, ცნობილი კომპოზიტორი ოზან დოღულუ. მათ ყველამ იძულებით ჩააბარეს სისხლისა და თმის ნიმუშები ტოქსიკოლოგიური ანალიზისთვის.
ბერენ საათი და ქენან დოღულუ სასამართლო კონტროლის ქვეშ აიყვანეს. მათ დროებით აეკრძალათ თურქეთის ტერიტორიის დატოვება ექსპერტიზის საბოლოო შედეგების მიღებამდე. ანალიზების შედეგები რამდენიმე დღის წინ გამოცხადდა. მსახიობის მეუღლისა და მისი ძმის ორგანიზმში სპეციალისტებმა ნივთიერებების კვალი აღმოაჩინეს, ხოლო ბერენ საატის ანალიზები უარყოფითი აღმოჩნდა.
„ჩუქურის“ ჯელასუნი კუბილაი აკა საქმის ერთ-ერთი პირველი ფიგურანტი გახდა. ისიც, როგორც ყველა დანარჩენი, ჩვენების მისაცემად და ბიოლოგიური ნიმუშების ასაღებად პოლიციაში გადაიყვანეს. პროცედურების შემდეგ ვარსკვლავი იმავე დღეს გაათავისუფლეს. სიტუაცია დაიძაბა, როდესაც სასამართლო მედიცინის ინსტიტუტმა დამატებითი ტოქსიკოლოგიური დასკვნები მოამზადა და აკას აკრძალული ნივთიერებების კვალი აღმოუჩინეს.
თუმცა მსახიობმა და მისმა ადვოკატებმა ძალიან გონივრული დაცვის ხაზი შეიმუშავეს. მხარემ განაცხადა, რომ კუბილაი რეიდამდე ცოტა ხნით ადრე, ბანგკოკში დასვენებისას, მძიმედ დაავადდა. მსახიობის თქმით, აუტანელი თავის ტკივილის გამო ის ადგილობრივ ტაილანდურ კლინიკას მიმართა, სადაც ექიმებმა მას სპეციფიკური, ძლიერი რეცეპტური მედიკამენტები მისცეს.
ნივთიერება, რომელიც სისხლში აღმოაჩინეს, თმის სტრუქტურაში არ იყო. ამან დაამტკიცა, რომ მსახიობს სისტემატურად არ მიუღია. პროკურატურამ მსახიობის მიმართ სისხლის სამართლის საქმის შეწყვეტის შესახებ დადგენილება გამოიტანა დანაშაულის შემადგენლობის არარსებობის გამო.
სერიალ „სამოთხის ბავშვების“ მთავარი როლის შემსრულებელი ისმაილ ჰაჯიოღლუ ზამთარში დააკავეს. ბევრი სხვა ვარსკვლავისგან განსხვავებით, ისმაილ ჰაჯიოღლუმ დაკითხვისას ყველაფერი მაშინვე აღიარა, ანალიზების შედეგებამდეც კი. არტისტმა გაამხილა, რომ თავისი ცნობადობის გამო აკრძალულ ნივთიერებებს არასდროს ყიდულობდა პირადად, ხელიდან ხელში. ის ნარკოტიკებს ინტერნეტით უკვეთავდა, კურიერები აკრძალულ ნივთებს პირდაპირ მის საფოსტო ყუთში ტოვებდნენ მრავალბინიან სახლში, ხოლო ისმაილი წინასწარ დებდა იქ ნაღდ ფულს.
მსახიობმა გულწრფელად განაცხადა, რომ ნივთიერებები პირველად ინტერესის გამო ნიდერლანდებში მოგზაურობისას გასინჯა. მოგვიანებით, თურქეთში დაბრუნებისას, მათ მიმართა გადაღებებისას განცდილი მძიმე ემოციური გადაწვისა და სტრესის პერიოდში, რათა მოდუნებულიყო. მან ჩადენილი საქციელი საჯაროდ მოინანია.
დაკავების მომენტში ჰაჯიოღლუ მთავარ როლს ასრულებდა ახალ მასშტაბურ დრამატულ სერიალში „სამოთხის ბავშვები“, რომელიც სახელმწიფო ტელეარხზე გადიოდა.
არხის ხელმძღვანელობამ რადიკალურ ზომებს მიმართა. ისმაილის სცენები ჯერ არგამოსული სერიებიდან სრულად ამოჭრეს. პროდიუსერებმა სასწრაფოდ გადაწერეს სცენარი, სიუჟეტში მისი პერსონაჟი „მოკლეს“, განაახლეს სერიალის ოფიციალური პრომო-პლაკატები მისი სახის გარეშე და პროექტიდან კიდევ 5 მსახიობი გაუშვეს, რომელთა ხაზებიც მის გმირთან იყო დაკავშირებული. პროექტში ჩანაცვლებისთვის ახალი სახეები შეიყვანეს.
გამოძიებასთან თანამშრომლობის, დანაშაულის სრულად აღიარებისა და იმ მტკიცებულებების არარსებობის გამო, რომლებიც ვაჭრობაზე ან გავრცელებაზე მიუთითებდა, პროკურორმა ისმაილ ჰაჯიოღლუ დაკითხვის შემდეგ პატიმრობიდან გაათავისუფლა. სასამართლომ მას გამოსაცდელი ვადა დაუნიშნა ფსიქოლოგიური რეაბილიტაციის სავალდებულო კურსით.
პოპულარული მსახიობი, მომღერალი და ტიტულ „მის თურქეთი 1999“-ის მფლობელი აიშელ ხათუნ ონალი სულ ახლახან დააკავეს. დაკითხვის შემდეგ ონალი გაუშვეს, მაგრამ მის ჯგუფში მყოფი 9 ადამიანისგან განსხვავებით, რომლებიც სასამართლომ მაშინვე დააპატიმრა, მომღერალმა თავიდან აიცილა მკაცრი აღკვეთის ღონისძიება.
თავად ვარსკვლავი კატეგორიულად უარყოფდა დანაშაულს და მართალიც იყო, რადგან მისი ანალიზები სუფთა აღმოჩნდა.
გამომძიებლებმა ასევე ზედმიწევნით დაკითხეს ონალი ბიზნესმენ კასიმ გარიფოღლუსთან მისი კავშირის შესახებ, რომლის დახურული წვეულებების ირგვლივაც აიგო მთელი გლობალური გამოძიება. მომღერალმა არ უარყო ნაცნობობა, მაგრამ განაცხადა, რომ ის უკვე მრავალი წელია არ უნახავს, ხოლო მის წვეულებებზე დაახლოებით 9 წლის წინ 1-2-ჯერ იმყოფებოდა და იქ არაფერი საეჭვო არ შეუმჩნევია.
წაიკითხეთ ასევე: