რუს ოპოზიციონერს 2 პოსტის გამო 7 წლით პატიმრობა მიუსაჯეს - რას წერდა მაქსიმ კრუგლოვი უკრაინაში დაღუპულებზე?

რუსეთში პოლიტიკური რეპრესიები ახალ ფაზაში გადადის. მოსკოვის სასამართლომ ოპოზიციური პარტია "იაბლოკოს" თავმჯდომარის მოადგილეს და მოსკოვის საქალაქო დუმის ყოფილ დეპუტატს, მაქსიმ კრუგლოვს, უმკაცრესი განაჩენი გამოუტანა. მას 7 წლით თავისუფლების აღკვეთა მხოლოდ ორი სოციალური პოსტის გამო მიესაჯა, რომლებსაც ხელისუფლება "სამხედრო ფეიკებად" მიიჩნევს.

მოსკოვის ზამოსკვორეცკის სასამართლომ მაქსიმ კრუგლოვი დამნაშავედ ცნო "სამხედრო ფეიკების" გავრცელებაში და მას 7-წლიანი პატიმრობა საერთო რეჟიმის კოლონიაში მიუსაჯა. აღსანიშნავია, რომ პროკურორი იულია გუზნიაევა მისთვის 8 წელს ითხოვდა.

ბრალდების მხარე ამტკიცებდა, რომ პოლიტიკოსის ქმედებაში იკვეთებოდა "პოლიტიკური სიძულვილის" მოტივი, რაც სასჯელს კიდევ უფრო ამძიმებს.

• თავად კრუგლოვი კი აცხადებს, რომ "პოლიტიკური უთანხმოება სიძულვილის ტოლფასია" დღევანდელ რუსეთში და ეს განაჩენი სხვა არაფერია, თუ არა განსხვავებული აზრის მქონე ადამიანების დაშინება.

პოლიტიკოსის წინააღმდეგ სისხლის სამართლის საქმის აღძვრის საფუძველი 2022 წლის აპრილში გამოქვეყნებული ორი პოსტი გახდა.

• პირველი პოსტი: ეხებოდა ქალაქ ბუჩაში მშვიდობიანი მოსახლეობის მკვლელობას. კრუგლოვი წერდა, რომ რუსული არმიის იქ ყოფნას " მხოლოდ "სიკვდილი და ნგრევა" მოჰყვა.
• მეორე პოსტი: პოლიტიკოსი გაეროს მონაცემებს ეყრდნობოდა და უკრაინაში დაღუპული 1267 მშვიდობიანი მოქალაქის შესახებ წერდა.

მიუხედავად იმისა, რომ პოსტები სამ წელზე მეტი ხნის წინ გამოქვეყნდა, სამართალდამცავებმა კრუგლოვი მხოლოდ გასული წლის ოქტომბერში დააკავეს.

მაქსიმ კრუგლოვი პარტია "იაბლოკოს" 17 წლის ასაკიდან შეუერთდა. ის პოლიტოლოგიის მეცნიერებათა კანდიდატია და 2019 წელს მოსკოვის საქალაქო დუმის დეპუტატად აირჩიეს, სადაც ოპოზიციურ ფრაქციას ხელმძღვანელობდა. დეპუტატობის პერიოდში ის აქტიურად აკრიტიკებდა საკონსტიტუციო ცვლილებებს.

წყარო