ეკა ჩავლეიშვილი ფილმში ალისია ვიკანდერთან და კირა ნაითლისთან ერთად ითამაშებს
რეჟისორ საიმონ ვუდსის ახალ ფილმში "The Worst“ ერთ-ერთ როლს ქართველი მსახიობი, ეკა ჩავლეიშვილი შეასრულებს. აღნიშნულის შესახებ გამოცემა "OK" წერს. ფილმის გადაღება საფრანგეთში უკვე დაიწყო.
მთავარ როლებს ალისია ვიკანდერი, კირა ნაითლი და ერინ კელიმანი ასრულებენ. პროექტში ასევე მონაწილეობენ ტომ ჰოლანდერი, სემ კლაფლინი, შიან კლიფორდი და ანა მაქსველ მარტინი.
- ფილმის მთავარი გმირები ემილი ფიშერი (ალისია ვიკანდერი) და მისი მეუღლე მაქსი (ტომ ჰოლანდერი) არიან, რომლებიც თავიანთ მდიდარ მეგობრებს საფრანგეთში, ახალ შატოში გამართულ საღამოზე ეპატიჟებიან.
"სულ 12 მსახიობია ფილმში. ყველა ერთმანეთზე უკეთესია — პროფესიონალები, მოწესრიგებულები, ნიჭიერები და ძალიან კეთილგანწყობილები. ახლა ვმოგზაურობ საიმონ ვუდსის ჯადოსნურ სამყაროში,“ — ამბობს მსახიობი.