საუდის არაბეთში ვერტმფრენის ჩამოვარდნის შედეგად 14 ადამიანი დაიღუპა

საუდის არაბეთში, აღმოსავლეთ სანაპიროზე მდებარე ქალაქ რას ტანურაში, სახელმწიფო ნავთობკომპანია Aramco-ს კუთვნილი ვერტმფრენი ჩამოვარდა, რის შედეგადაც ბორტზე მყოფი 14-ვე ადამიანი დაიღუპა. ინფორმაციას საუდის არაბეთის სახელმწიფო საინფორმაციო სააგენტო ავრცელებს.

ავიაკატასტროფა ადგილობრივი დროით დაახლოებით 06:00 საათზე მოხდა.

• საუდის არაბეთის პრესის სააგენტოს ინფორმაციით, დაღუპულები ქვეყნის მოქალაქეები იყვნენ. ამ ეტაპზე ავარიის მიზეზი უცნობია და ფაქტზე გამოძიება მიმდინარეობს.

კომპანია Aramco-ს მომხდართან დაკავშირებით ოფიციალური კომენტარი ჯერჯერობით არ გაუკეთებია.

საუდის არაბეთის ენერგეტიკის სამინისტრომ დაღუპულთა ოჯახებს სამძიმარი გამოუცხადა და განაცხადა, რომ გამოძიება ავარიის გარემოებების დასადგენად გრძელდება.

სააგენტო Reuters-ის ცნობით, რას ტანურაში მდებარე Aramco-ს ნავთობტერმინალმა ნავთობის ჩატვირთვა რამდენიმე დღის წინ განაახლა. ახლო აღმოსავლეთში მიმდინარე სამხედრო დაძაბულობის გამო ოპერაციები თითქმის ოთხი თვის განმავლობაში შეჩერებული იყო.

წყარო