FDA-ს ახალი გადაწყვეტილება ნიკოტინის პროდუქტებზე
აშშ-ის სურსათისა და მედიკამენტების ადმინისტრაციამ (FDA), მასშტაბური სამეცნიერო კვლევის საფუძველზე, ნიკოტინის ბალიშების (პაუჩების) 20 დასახელებას „მოდიფიცირებული რისკის“ სტატუსი მიანიჭა.
აღნიშნული პროდუქტები აშშ-ის ბაზარზე ჯერ კიდევ 2025 წლის იანვრიდანაა დაშვებული, თუმცა ახლანდელი გადაწყვეტილება მწარმოებელს უფლებას აძლევს, მარკეტინგულ აქტივობებში ოფიციალურად გამოიყენოს შემდეგი გზავნილი: „სიგარეტის ჩანაცვლება აღნიშნული პროდუქტებით ამცირებს პირის ღრუსა და ფილტვის კიბოს, გულის დაავადებების, ინსულტის, ემფიზემისა (ფილტვის ქრონიკული პროგრესირებადი დაავადება) და ქრონიკული ბრონქიტის განვითარების რისკს“.
აღსანიშნავია, რომ „მოდიფიცირებული რისკის თამბაქოს პროდუქტის“ (MRTP) სტატუსი გაიცემა კონკრეტულ ნაწარმზე და არ ვრცელდება ნიკოტინის ბალიშების მთელ კლასზე.
კომპანიის განაცხადის შესწავლისას FDA-მ დეტალურად შეაფასა პროდუქტის გავლენა ჯანმრთელობაზე, მომხმარებელთა აღქმა, არასრულწლოვანებთან დაკავშირებული რისკები და ზოგადი გავლენა საზოგადოებრივ ჯანდაცვაზე. სააგენტოს დასკვნით, ნიკოტინის აღნიშნული ბალიშების მწარმოებლის შემთხვევაში, რისკების შემცირების შესახებ განაცხადი მეცნიერულად ზუსტია და მომხმარებლები მას სწორად იგებენ. გადაწყვეტილების მიღებისას უწყებამ ასევე გაითვალისწინა თამბაქოს ნაწარმის სამეცნიერო საკონსულტაციო კომიტეტის 2026 წლის 22 იანვრის სხდომის რეკომენდაციები და საზოგადოებრივი აზრი.
თამბაქოს ნებისმიერი ახალი პროდუქტის ლეგალურად გაყიდვა ბაზარზე სტანდარტული ავტორიზაციითაც (PMTA) შესაძლებელია, თუმცა „მოდიფიცირებული რისკის“ (MRTP) სტატუსის მოპოვება მწარმოებლებისთვის უნიკალური შანსია. ეს მათ საშუალებას აძლევს, მომხმარებელს ოფიციალურად დაანახონ ზიანის შემცირების გზები, ხოლო მწეველებს შესაძლებლობა ექმნებათ, მიიღონ უფრო ინფორმირებული გადაწყვეტილებები.
მიღებული ნებართვა მწარმოებელ კომპანიას ავალდებულებს, მუდმივად განახორციელოს ბაზრის მონიტორინგი და შეისწავლოს მომხმარებელთა ქცევა. ლიცენზია 5 წლით არის გაცემული და ვადის ამოწურვამდე კომპანიას მის გაგრძელებაზე განაცხადის გაკეთება შეუძლია, თუმცა, თუ სააგენტო ნებისმიერ ეტაპზე აღმოაჩენს, რომ პროდუქტი საზოგადოებრივ ჯანმრთელობას უქმნის საფრთხეს, მაგალითად, თუ მოზარდებში მისი მოხმარება მკვეთრად გაიზრდება, FDA ნებართვას გააუქმებს.
FDA-მ აღნიშნული პროდუქტების გაყიდვის პირველადი უფლება 2025 წლის 16 იანვარს გასცა. სააგენტო კიდევ ერთხელ ხაზგასმით აღნიშნავს, რომ სრულიად უსაფრთხო თამბაქოს ნაწარმი არ არსებობს და ვინც მას არ მოიხმარს, არც უნდა დაიწყოს. აქტიური მწეველებისთვის საუკეთესო გამოსავალი ნიკოტინზე სრულიად უარის თქმაა.
FDA-ს ავტორიზაციას თან ახლავს ბაზრის მუდმივი მონიტორინგი: სააგენტო აკვირდება პროდუქტის პასუხისმგებლობიან კომერციალიზაციას, ზრდასრულ მომხმარებლებთან კომუნიკაციასა და არასრულწლოვანთა ხელმისაწვდომობის პრევენციას.