ისრაელი ირანის მთავარი მომლაპარაკებლების მოკვლას გეგმავდა? - რას წერს NYT ამერიკელ ჩინოვნიკებზე დაყრდნობით

აშშ ირანის ხელისუფლებას ფარულად აფრთხილებდა, რომ ისრაელს შესაძლოა, თეირანის მთავარი მომლაპარაკებლების ლიკვიდაცია ეცადა.

• ამის შესახებ The New York Times-ი ამერიკელ და ახლო აღმოსავლეთის ოფიციალურ პირებზე დაყრდნობით წერს.

• გამოცემის ინფორმაციით, ვაშინგტონში შიშობდნენ, რომ ისრაელი ირანის საგარეო საქმეთა მინისტრის, აბას არაღჩის და პარლამენტის თავმჯდომარის, მოჰამედ ბაღერ ღალიბაფის მოკვლას აპირებდა.

ორივე მათგანი ირანსა და აშშ-ს შორის მიმდინარე მოლაპარაკებებში მნიშვნელოვან როლს ასრულებდა და ოფიციალური პირების შეფასებით, მათი მკვლელობა სამშვიდობო პროცესს სერიოზულად დააზიანებდა.

ამერიკელები თვლიდნენ, რომ აპრილში სერიოზული მოლაპარაკებების დაწყების შემდეგ, ნებისმიერი მკვლელობის მცდელობა მოლაპარაკებებს დაასრულებდა და კონფლიქტს ხელახლა გაამწვავებდა.

• გამოცემა ირანელ ოფიციალურ პირებზე დაყრდნობით წერს, რომ თეირანი, პაკისტანისა და კატარის შუამავლობით, აშშ-სგან გარანტიებს ითხოვდა, რომ ისრაელი დიპლომატიური შეხვედრების დროს ირანის მოლაპარაკებების დელეგაციას არ დაესხმებოდა თავს.

გამოცემის ცნობით, ვაშინგტონმა შეიტყო, რომ ღალიბაფი, სულ მცირე, ისრაელის სამიზნეების სიაში იყო შეყვანილი.

The New York Times-ის ინფორმაციით, აპრილში მოჰამედ ბაღერ ღალიბაფი პაკისტანში იმყოფებოდა, ხოლო მისი თეირანში დაბრუნებისას, უსაფრთხოების სამსახურებმა ეკიპაჟს აცნობეს, რომ ისრაელი შესაძლოა, თვითმფრინავზე თავდასხმას გეგმავდა. გამოცემა წერს, რომ ამ ინფორმაციის ფონზე ირანის საჰაერო სივრცესთან ისრაელის ორი გამანადგურებელი გამოჩნდა.

• ეს ინფორმაცია ემთხვევა ღალიბაფის უფროსი მრჩევლის, მაჰდი მოჰამადის, განცხადებასაც. მისი თქმით, უსაფრთხოების მიზეზებით თვითმფრინავი იძულებული გახდა ირანის ქალაქ მეშჰადში საგანგებო დაშვება განეხორციელებინა, რის შემდეგაც დელეგაციამ თეირანში გზა ავტომობილებით გააგრძელა.

გამოცემის ცნობით, ირანი ვაშინგტონისგან დამატებით უსაფრთხოების გარანტიებსაც ითხოვდა, რათა მისი წარმომადგენლების საერთაშორისო ვიზიტები საფრთხის ქვეშ არ აღმოჩენილიყო.

გამოცემის ცნობით, ვაშინგტონში ისრაელის საელჩოს წარმომადგენლებმა ამ თემაზე კომენტარის გაკეთებაზე უარი განაცხადეს.