დრონებით შეტევა ყირიმში, სამხედრო აეროდრომებზე - განადგურდა და დაზიანდა 7 თვითმფრინავი
უკრაინის უსაფრთხოების სამსახურმა დროებით ოკუპირებულ ყირიმში საკისა და გვარდიისკეს სამხედრო აეროდრომებზე წარმატებული დარტყმები განახორციელა, - ინფორმაციას უკრაინული მედია ქვეყნის უსაფრთხოების სამსახურზე დაყრდნობით ავრცელებს.
"საკის აეროდრომზე დარტყმები განხორციელდა ავიაციის აღჭურვილობის შესანახ შვიდ ანგარზე, სადაც განთავსებული იყო Su-30SM, Su-30, და Su-24 ტიპის გამანადგურებლები და ფრონტის ხაზის ბომბდამშენები. წინასწარი ინფორმაციით, განადგურდა ან დაზიანდა მინიმუმ შვიდი თვითმფრინავი“, - აცხადებენ უკრაინის უსაფრთხოების სამსახურში.
მათივე ინფორმაციით, ამ კვირაში ეს საკის აეროდრომზე უკრაინის უსაფრთხოების სამსახურის მიერ განხორციელებული მეორე დარტყმაა.
- უკრაინის უსაფრთხოების სამსახურის ცნობით, გვარდიისკეს სამხედრო აეროდრომზე ორ ანგარს დაარტყეს, სადაც "შაჰედის“ უპილოტო საფრენი აპარატი და საავიაციო აღჭურვილობა იყო განთავსებული.
„სამხედრო აეროდრომები „საკი“ და „გვარდიისკე“ ყირიმში რუსეთის საოკუპაციო ძალების მნიშვნელოვანი საჰაერო ბაზებია. სწორედ იქიდან ფრინდებიან რეგულარულად ტაქტიკური თვითმფრინავები, რომლებიც უკრაინის ტერიტორიაზე სარაკეტო და ბომბდამშენ დარტყმებს ახორციელებენ და სამხრეთის მიმართულებით რუსული დაჯგუფების მოქმედებებს უზრუნველყოფენ“, - აცხადებენ უკრაინის უსაფრთხოების სამსახურში.