“ცუდი ამბავი მაქვს, ჩემი კუჭი საკუთარ თავს ჭამს“ - მილიონერმა, რომელიც მარადიული ახალგაზრდობის შესანარჩუნებლად, საკუთარი ვაჟის სისხლს ისხამდა, მძიმე დიაგნოზი გაასაჯაროვა
ცნობილმა ინფლუენსერმა და მილიონერმა ბრაიან ჯონსონმა, რომელიც წლებია სიბერესთან ბრძოლის ექსტრემალური მეთოდებითაა დაკავებული, საზოგადოებას თავისი ჯანმრთელობის მდგომარეობის შესახებ ინფორმაცია გაუზიარა. ჯონსონმა აღიარა, რომ მას ქრონიკული აუტოიმუნური დაავადება დაუდგინდა.
ივნისის ბოლოს ჯონსონმა განაცხადა, რომ მას აუტოიმუნური გასტრიტის (AIG) დიაგნოზი დაუსვეს. ეს არის მდგომარეობა, როდესაც ადამიანის იმუნური სისტემა შეცდომით საკუთარი კუჭის ლორწოვან გარსს უტევს. თავად ინფლუენსერმა ეს მდგომარეობა საკმაოდ ემოციურად აღწერა და აღნიშნა, რომ მისი “კუჭი საკუთარ თავს ჭამს“.
-
ჯონსონის თქმით, მან არ იცის, რამდენი ხანია, რაც ამ დაავადებით ცხოვრობს, რადგან მსგავსი მდგომარეობა ხშირად შეუმჩნეველი რჩება და იმაზე მეტ ადამიანს შეიძლება აწუხებდეს, ვიდრე დღესაა დიაგნოსტირებული.
ბრაიან ჯონსონი მსოფლიოში ცნობილია თავისი ამბიციური პროექტით - Project Blueprint, რომელიც 2021 წელს დაიწყო. მისი მიზანია მაქსიმალურად შეანელოს დაბერების პროცესი, რისთვისაც ის ყოველდღიურად 80-ზე მეტ ბიოლოგიურად აქტიურ დანამატს იღებს, გადის ექსპერიმენტულ მკურნალობას და იცავს უმკაცრეს ცხოვრების წესს.
მიუხედავად იმისა, რომ თანამედროვე მედიცინა აუტოიმუნურ გასტრიტს განუკურნებელ, ქრონიკულ დაავადებად მიიჩნევს და მხოლოდ მისი სიმპტომების მართვაზეა ორიენტირებული, ჯონსონი დანებებას არ აპირებს. მას უკვე ჩაუტარდა მრავალჯერადი სამედიცინო სკანირება და რკინის ინფუზია.
“ჩემი გუნდი და მე ვაპირებთ, შევებრძოლოთ ამ დაავადებას. მედიცინა მას განიხილავს, როგორც რაღაცას, რაც უბრალოდ უნდა მართო და არა განკურნო. ჩვენ გვინდა ეს შევცვალოთ“, - აცხადებს ჯონსონი.
მისი აზრით, ხელოვნური ინტელექტის, მულტიომიკისა და დნმ-ის ტექნოლოგიების ეპოქაში არცერთი მდგომარეობა არ უნდა ჩაითვალოს განუკურნებლად მხოლოდ იმიტომ, რომ აქამდე მისი განკურნება ვერავინ შეძლო.
იხილეთ ასევე:
- სიგიჟე თუ უბერებლობის საიდუმლო? - 2-მილიონიანი პროგრამა, რომლითაც 45 წლის კაცი გაახალგაზრდავებას ცდილობს: როგორ გამოიყურება ის პროცედურების დაწყების შემდეგ (ფოტოები)
- ცნობილმა ბიზნესმენმა სახეში სხვა ადამიანის ცხიმი შეიყვანა - "ახალგაზრდობით შეპყრობილი" 46 წლის მამაკაცის წარუმატებელი ოპერაცია: "ბრაიანმა დროებით მხედველობაც დაკარგა"