სისხლიანი ამბოხი შრი-ლანკის ციხეში, 25 დაღუპული და 100-ზე მეტი დაშავებული - რა გახდა მასობრივი დაპირისპირების მიზეზი? (ვიდეო)

შრი-ლანკის დასავლეთ ნაწილში, ქალაქ ნეგომბოს ციხეში მომხდარ მასობრივ არეულობას სულ მცირე 25 ადამიანის სიცოცხლე ემსხვერპლა, მათ შორის 4 ციხის ზედამხედველია. დაშავებულთა რაოდენობა კი 100-ს აჭარბებს. ორდღიანი ქაოსის შემდეგ, ქვეყნის ხელისუფლებამ სამხედროები სრულ მზადყოფნაში მოიყვანა.

• წინასწარი ინფორმაციით, სასტიკი დაპირისპირება კვირას ორ პატიმართა ჯგუფს შორის დაიწყო. გავრცელებული ცნობით, კონფლიქტის მიზეზი ციხის შიგნით არსებული ნარკოტრეფიკინგის სქემის შესახებ ინფორმაციის გაცემა გახდა.

ვითარება მას შემდეგ გამწვავდა, რაც პატიმრებმა ზედამხედველებისთვის იარაღის წართმევა მოახერხეს. ორშაბათს დილით ძალადობის ახალმა ტალღამ იფეთქა — პატიმრები ციხის ჭიშკრის გარღვევას შეეცადნენ, რის გამოც ადგილზე უსაფრთხოების დამატებითი ძალები მობილიზდნენ. შენობის შიგნიდან არაერთი გასროლის ხმა ისმოდა.

• პროტესტი სახურავებზე და ჩამონგრეული ჭერი

არეულობის დროს პატიმართა ნაწილი, მათ შორის ქალთა განყოფილებიდან, შენობის სახურავზე აძვრა და გათავისუფლებას ითხოვდა. ტრაგიკულად დასრულდა სახურავის ნაწილის ჩამონგრევა, რის შედეგადაც რამდენიმე ქალი დაშავდა.

დაჭრილები ნეგომბოსა და კოლომბოს ეროვნულ საავადმყოფოებში არიან გადაყვანილები. მედიკოსების განცხადებით, პატიმრებს ჭრილობები ცეცხლსასროლი იარაღითა და ცივი იარაღით აქვთ მიყენებული, ბევრ მათგანს კი სხეულზე მრავლობითი დაჟეჟილობა აღენიშნება.

“არ ვიცით, ვინ არის ცოცხალი და ვინ - მკვდარი“ ციხის გარეთ ასეულობით ახლობელი შეიკრიბა, რომლებიც პატიმრების შესახებ ინფორმაციას ითხოვენ. “არავინ გვეუბნება, სად არიან ჩვენი ახლობლები ან საერთოდ გადარჩნენ თუ არა“, - აცხადებენ შეშფოთებული ოჯახის წევრები.

შრი-ლანკის იუსტიციისა და ციხეების მინისტრმა, ჰარშანა ნანაიაკარამ მომხდარზე მკაცრი გამოძიების ბრძანება უკვე გასცა. ამ დროისთვის პატიმრების სხვა დაწესებულებებში გადაყვანის პროცესი მიმდინარეობს.

შრი-ლანკაში ციხეები ოთხჯერ მეტად გადატვირთულია ეს ინციდენტი ბოლო წლების განმავლობაში ყველაზე მასშტაბური და სისხლიანია. ექსპერტების განცხადებით, მთავარი პრობლემა ციხეების გადატვირთულობაა.

ამჟამად შრი-ლანკის ციხეებში 41,250 პატიმარი იმყოფება, რაც მათ რეალურ ტევადობაზე ოთხჯერ მეტია.

წყარო