სისხლიანი გარჩევა ტორონტოს ქუჩის ფესტივალზე - სროლას 2 ადამიანი ემსხვერპლა, 13 000 ადამიანი პანიკამ მოიცვა: რას წერს მედია?
კანადის უმსხვილეს ქალაქში ნამდვილი ტრაგედია დატრიალდა. ტორონტოში გამართული პოპულარული ქუჩის ფესტივალი, რომელსაც ათიათასობით ადამიანი ესწრებოდა, სისხლისღვრაში გადაიზარდა.
შემთხვევა წმინდა კლერის გამზირზე (St Clair Avenue), ადგილობრივი დროით დაახლოებით 20:12 საათზე მოხდა, როდესაც ქუჩაში ლათინოამერიკული მუსიკისა და ცეკვის პოპულარული ფესტივალი “სალსა წმინდა კლერზე“ (Salsa on St Clair) მიმდინარეობდა.
ტორონტოს პოლიციის უფროსის მოადგილემ, ფრანსისკო ბარედომ შემთხვევის ადგილი აღწერა, როგორც “უკიდურესად ქაოტური“. მისი განცხადებით, სროლის დაწყების მომენტში ფესტივალს დაახლოებით 13,000 ადამიანი ესწრებოდა. პოლიცია ამჟამად სამ სხვადასხვა დანაშაულის ადგილზე მუშაობს, რომლებიც ამ შემზარავ შემთხვევასთან არის დაკავშირებული.
გამოძიების პირველადი ინფორმაციით, ფესტივალზე ორ პირს შორის ცეცხლსასროლი იარაღით დაპირისპირება მოხდა. პოლიციამ შემთხვევის ადგილიდან ორივე ცეცხლსასროლი იარაღი უკვე ამოიღო.
სამართალდამცავებმა ჭრილობებით სულ ექვსი მსხვერპლი იპოვეს, 2 ადამიანი ადგილზევე გარდაიცვალა. ამ დროისთვის სამძებრო სამუშაოები გრძელდება.