აშშ-ში, მშობლებმა 6 შვილი, 38 გრადუსს სიცხეში, ჩაკეტილ მანქანაში დატოვეს, თავად კი რესტორანში სადილობდნენ - მაშველებმა მათი გადარჩენა შეძლეს, თუმცა მშობლები დაკავებულები არიან
ამერიკის შეერთებულ შტატებში, კანზასის შტატში, პოლიციამ ცოლ-ქმარი დააკავა, რომლებმაც თავიანთი 6 შვილი, მათ შორის ორი 7 თვის ჩვილი, მანქანაში გამომწყვდეული დატოვეს, სანამ თავად სწრაფი კვების ობიექტში სადილობდნენ.
53 წლის მაიკლ კრიუგერი და 40 წლის ტიფანი კრიუგერი ბრალდებულები არიან ბავშვების უმეთვალყურეოდ დატოვებაში დაახლოებით 20-დან 30 წუთის განმავლობაში. შემთხვევა ქალაქ სალინაში მოხდა, სწრაფი კვების რესტორან Wingstop-თან.
იმ დღეს გარეთ ტემპერატურა რეკორდულ ნიშნულს, თითქმის 38 გრადუს ცელსიუსს (100°F) აღწევდა, ხოლო სითბური ინდექსი კიდევ უფრო მაღალი იყო. პოლიციის ინფორმაციით, მშობლები ამ დროს რესტორანში მშვიდად სადილობდნენ, სანამ მათი შვილები წელიწადის ერთ-ერთ ყველაზე ცხელ დღეს ჩაკეტილ ავტომობილში იმყოფებოდნენ.
ავტომობილში სულ 6 არასრულწლოვანი იმყოფებოდა, რომელთა სიცოცხლეც საფრთხის ქვეშ დადგა:
- ორი 7 თვის ჩვილი;
- 2 წლის ბავშვი;
- 4 წლის ბავშვი;
- 5 წლის ბავშვი;
- 13 წლის მოზარდი.
მეხანძრე-მაშველთა სამსახურის წარმომადგენელმა, ჩად სკოვილმა საზოგადოება გააფრთხილა, რომ ბავშვის სხეულის ტემპერატურა 3-დან 5-ჯერ უფრო სწრაფად იზრდება, ვიდრე ზრდასრულის. მისივე თქმით, ავტომობილის შიგნით ტემპერატურა პირველ 10 წუთში შეიძლება 20 გრადუსით (ფარენჰაიტით) გაიზარდოს, მაშინაც კი, თუ ფანჯარა ოდნავ ღიაა.
„ტემპერატურამ მანქანაში შესაძლოა სასიკვდილო დონეს წუთებში მიაღწიოს“, - აღნიშნა სკოვილმა.
ადგილზე მისულმა მაშველებმა ბავშვების მდგომარეობა შეაფასეს. ამ დროისთვის ზუსტად უცნობია, მიიღეს თუ არა მათ რაიმე სერიოზული დაზიანება სიცხისგან, თუმცა ყველა მათგანი სახელმწიფო მზრუნველობის ქვეშ (დამცავ პატიმრობაში) გადაიყვანეს.
მშობლები, მაიკლ და ტიფანი კრიუგერები, დაკავებულები არიან და მათ ბრალი არასრულწლოვნების საფრთხეში ჩაგდების მუხლით ედებათ.