"ბრალდებულს 225 ვიდეოჯარიმა ჰქონდა" - რას ამბობს გორში მომხდარ ავარიაზე პროკურორი

"ბრალდებულს 225 ვიდეოჯარიმა ჰქონდა, მათ შორის სიჩქარის გადაჭარბებაზე", - ამის შესახებ გორში მომხდარ ავტოავარიასთან დაკავშირებით, პროკურორმა შორენა მგალობლიშვილმა "ქართლის ამბებს" განუცხადა.

მისი თქმით, იმ პერიოდში, როდესაც გორის ცენტრში მანქანით დედა-შვილს დაეჯახა, ბრალდებული მართვის მოწმობით სარგებლობდა და არ ჰქონდა ჩამორთმეული.

• ცნობისთვის, გორში მომხდარი ავტოსაგზაო შემთხვევის ფაქტზე, რომელსაც დედა-შვილი ემსხვერპლა, დაკავებულ რევაზ ელიზბარაშვილს აღკვეთის ღონისძიების სახით პატიმრობა შეეფარდა.

დაკავებულს ბრალდება საქართველოს სისხლის სამართლის კოდექსის 276-ე მუხლის მე-9 ნაწილით (ალკოჰოლის ზემოქმედების ქვეშ, ავტომობილის მოძრაობის უსაფრთხოების წესის დარღვევა, რამაც ორი ადამიანის სიცოცხლის მოსპობა გამოიწვია) წარედგინა, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს.

ავტოსაგზაო შემთხვევა გორის ცენტრში, ჭავჭავაძის ქუჩაზე, 13 ივლისს მოხდა. „ჯიპის“ ტიპის ავტომანქანა ქვეითად მოსიარულე ახალგაზრდა ქალს და მის 3 წლის გოგონას დაეჯახა.

ავტოსაგზაო შემთხვევის შედეგად დაშავებული დედაც და შვილი კლინიკაში გარდაიცვალნენ.

• ნახეთ ასევე:
• "ვის ხოცავთ ხალხო, ვის გაზრდილ შვილებს ხოცავთ, ვის ოჯახებს ამწარებთ?!" - გორში დაღუპული დედა-შვილის ნათესავი მომხდარის დეტალებზე საუბრობს