"იმღერეთ ურალსა და ტულაში!“ - როგორ ჩაშალა ქართველების პროტესტმა ანი ლორაკისა და T.A.T.U.-ს კონცერტები ბათუმში: რას წერს უკრაინული მედია
ზაფხულის სეზონი ბათუმში ხმაურიანი მუსიკალური ივენთებით უნდა ყოფილიყო დატვირთული, თუმცა გეგმები რადიკალურად შეიცვალა. უკრაინის მოღალატედ შერაცხული მომღერლის, ანი ლორაკისა და რუსული პოპ-დუეტის, „T.A.T.U.“-ს დაანონსებული კონცერტები ქართველი საზოგადოების მძლავრი პროტესტის შემდეგ ოფიციალურად გაუქმდა.
"მსოფლიო დონის შოუდან“ - სრულ გაუქმებამდე
კონცერტები ბათუმის საჩოგბურთო კორტებზე უნდა გამართულიყო: „T.A.T.U.“ მსმენელის წინაშე 1 აგვისტოს უნდა წარმდგარიყო, ხოლო ანი ლორაკის შოუ 14 აგვისტოს იგეგმებოდა.
"ჯერ კიდევ ივნისში ორგანიზატორები აქტიურად არეკლამებდნენ ლორაკის კონცერტს. მას „წარმოუდგენელ დივას“ უწოდებდნენ, რომელმაც „მილიონობით გულშემატკივარი დაიპყრო მთელ მსოფლიოში“ და მაყურებელს „დაუვიწყარ საზაფხულო საღამოსა და მსოფლიო დონის ფროდაქშენს“ ჰპირდებოდნენ. თუმცა, როგორც კი ბილეთები გაყიდვაში ჩაეშვა, სოციალურ ქსელებში ნამდვილი საპროტესტო ქარიშხალი ატყდა" - წერს უკრაინული მედია.
ბათუმის საჩოგბურთო კორტების ადმინისტრაციამ უკვე ოფიციალურად დაადასტურა, რომ ორივე ღონისძიება ჩაშლილია, ხოლო ბილეთების გაყიდვის პლატფორმებიდან ყველა ანონსი და აფიშა სასწრაფოდ წაიშალა.
"წადით ტაგანროგში!" - რას წერენ გაბრაზებული ქართველები?
ქართულ ინტერნეტსივრცეში ხალხმა მკაფიოდ დააფიქსირა საკუთარი პოზიცია რუსული აგრესიის მიმართ. სოციალური ქსელები აივსო აღშფოთებული და ირონიული კომენტარებით:
- „ვისაც მათი უგემოვნო ბოდვის მოსმენა და ცეკვა გინდათ, წადით ტაგანროგში. იქ ნამდვილად არ მოგაკლდებათ მსგავსი „მხიარულება“.“
- „რუსეთი ოკუპანტია! როდის უნდა მივხვდეთ ამას?! არ გრცხვენიათ?“
- „წაეთრიეთ აქედან! გამართეთ თქვენი უნიჭო კონცერტები ურალსა და ტულაში. დარწმუნებული ვარ, იქ უამრავი იდიოტი გაიქცევა თქვენს სალოკავად.“
- „საკუთარი მომღერლები არ გვყოფნის თუ ჩვენები არ არიან საკმარისად ცნობილები, ესენი რომ ჩამოგვყავს?“
- „რა ბედნიერებაა, ბოლოს და ბოლოს რაღაც ღირსეული მოხდა. თქვენ აქ რუსებისთვის არ უნდა მღეროდეთ!“
რატომ აღმოჩნდნენ მომღერლები მიუღებლები?
პროტესტის მიზეზი ამ შემსრულებლების პოლიტიკური პოზიცია (უფრო სწორად, მისი არარსებობა) გახდა:
ანი ლორაკი წარმოშობით უკრაინელი მომღერალი 2014 წლის შემდეგ აქტიურად აგრძელებს კარიერას რუსეთში და ჯიუტად დუმს უკრაინაში მიმდინარე სისხლიან ომზე. 2022 წელს უკრაინის პრეზიდენტმა ვოლოდიმირ ზელენსკიმ მას პერსონალური სანქციები დააკისრა, მოგვიანებით კი უკრაინის სახალხო არტისტის წოდებაც ჩამოართვეს.
დუეტი „T.A.T.U.“-ს ჯგუფის წევრებს სრულმასშტაბიანი ომის დაწყების შემდეგ რუსული აგრესია საჯაროდ არასოდეს დაუგმიათ. მეტიც, მათ ჩვეულებრივად გააგრძელეს შემოქმედებითი საქმიანობა რუსეთში და 2025 წელს ანექსირებულ ყირიმში კონცერტიც კი გამართეს.
აღსანიშნავია, რომ მათთვის ეს საქართველოში პირველი მარცხი არ არის. ჯერ კიდევ მიმდინარე წლის იანვარში თბილისშიც უნდა გამართულიყო კონცერტი, თუმცა მაშინაც საზოგადოებრივმა პროტესტის შემდეგ კონცერტი გაუქმდა.