ტროპიკული შტორმი "ბერტა" ხმელეთისკენ მიიწევს, წყნარ ოკეანეში კი ქარიშხალი "ფაუსტო" ჩამოყალიბდა - რა საფრთხეებზე საუბრობენ სინოპტიკოსები

მექსიკის ყურეში ტროპიკული შტორმი "ბერტა“ ჩამოყალიბდა და აშშ-ის სამხრეთ სანაპიროსკენ მიემართება. სინოპტიკოსების გაფრთხილებით, შტორმს თან ახლავს ძლიერი წვიმა, შტორმული ტალღები და წყალდიდობის საფრთხე.

• ქარის სიჩქარე საათში 64 კილომეტრს აღწევს, თუმცა, პროგნოზის მიხედვით, ხმელეთთან მიახლოებისას ის კიდევ უფრო გაძლიერდება.

სინოპტიკოსები ვარაუდობენ, რომ "ბერტა“ კვირის დასაწყისში ჩრდილოეთ მექსიკის ყურის სანაპიროსთან შენარჩუნდება და შემდეგ დასავლეთის მიმართულებით, ტეხასისკენ გადაინაცვლებს. შედეგად, ჩრდილოეთ ფლორიდის, ალაბამის, მისისიპისა და ლუიზიანის სანაპირო რაიონებში მოსალოდნელია ძლიერი ნალექი და წყალდიდობა.

ეროვნული ქარიშხლების ცენტრის ინფორმაციით, ლუიზიანისა და მისისიპის სანაპიროებზე შტორმული ტალღების სიმაღლემ შესაძლოა 1.2 მეტრს მიაღწიოს.

პარასკევის ჩათვლით დასავლეთ ფლორიდიდან ტეხასის ცენტრალურ ნაწილამდე სანაპირო ზოლზე წყალდიდობის საფრთხე შენარჩუნდება. განსაკუთრებით უხვ ნალექს ელოდებიან ლუიზიანაში.

ამავდროულად, წყნარი ოკეანის აღმოსავლეთ ნაწილში ქარიშხალი "ფაუსტო“ ჩამოყალიბდა. ამ ეტაპზე ხმელეთისთვის პირდაპირ საფრთხეს არ წარმოადგენს.

ეროვნული ქარიშხლების ცენტრის ცნობით, "ფაუსტოს“ ქარის მაქსიმალური სიჩქარე საათში დაახლოებით 120 კილომეტრია.

წყარო