“ძალიან ძნელია დედისთვის ამის თქმა მაგრამ ნეტა ნეტა ჩემი შვილი მომკვდარიყო და ის ცოცხალი ყოფილიყო“ - 17 წლის მოზარდის მკვლელობისთვის დაკავებული ნიკა კაპანაძის დედის პირველი კომენტარი
თბილისის ცენტრში გუშინ 17 წლის ბიჭი მოკლეს. შეიარაღებულმა პირმა ცეცხლი გაუხსნა ახალგაზრდებს, რის შედეგადაც ოთხი ადამიანი დაჭრა, მათ შორის ორი არასრულწლოვანი. სროლის დროს დაჭრილი ერთ-ერთი არასრულწლოვანი კლინიკაში გარდაიცვალა.
ვერაზე მომხდარი მკვლელობისა და დაჭრის ფაქტზე დაკავებული ნიკა კაპანაძეა. შინაგან საქმეთა სამინისტროს ინფორმაციით, კაპანაძემ დაკავების დროს, პოლიციას შეიარაღებული წინააღმდეგობა გაუწია - ის ამ დროისთვის კლინიკაშია მოთავსებული ხელზე მიღებული დაზიანების გამო.
ნიკა კაპანაძის დედა დოდო ოდიშარია “ტვ პირველთან“ მომხდარზე პირველ კომენტარს აკეთებს:
“იარაღით იყო სახლში, პოლიციას არ უშვებდა. მე გამომიყვანეს საერთოდ. იარაღის ხმა არ იყო, რაღაც სხვანაირი ხმა იყო... სპეცრაზმი მოვიდა, მე ვუთხარი - ნუ მიხვალთ კარებთან, მე მიმიშვით. ერთი მკვდარი ხოა, მეორე არ მინდა მეთქი. მე მესროლოს... არ გამაჩერეს, არაო.
ის ბავშვი არ მომკვდარიყო... ძალიან ძნელია დედისთვის ამის თქმა მაგრამ ნეტა ნეტა ჩემი შვილი მომკვდარიყო და ის ცოცხალი ყოფილიყო“, - განაცხადა "პირველებთან" 17 წლის მოზარდის მკვლელობისთვის დაკავებული ნიკა კაპანაძის დედამ.
- ცნობისთვის, 22 ივლისს, ვერაზე. შეიარაღებულმა პირმა ოთხი ადამიანი დაჭრა, მათ შორის ორი არასრულწლოვანი. სროლის დროს დაჭრილი ერთ-ერთი არასრულწლოვანი - ნიკოლოზ ღუნაშვილი კლინიკაში გარდაიცვალა.არსებული ინფორმაციით, თავდაპირველად შელაპარაკება დაკავებულ ნიკა კაპანაძის დედასა და დაჭრილებს შორის მოხდა. კერძოდ კი, კაფიდან გამოსულ ახალგაზრდებს, რომელთა ავტომანქანაც დაკავებულის საცხოვრებელი სახლის წინ იდგა, ქალმა შენიშვნა მისცა. არსებული ინფორმაციით, სწორედ აღნიშნულის შემდეგ განახორციელა დაკავებულმა გასროლა.
როგორც ირკვევა, ავტომანქანაში მყოფი ოთხი პირიდან ცეცხლსასროლი იარაღიდან გასროლილი ტყვია სამს მოხვდა, მძღოლი კი არ დაშავებულა.
რაც შეეხება მეოთხე დაჭრილს, ის ტაქსით გადაადგილდებოდა, რა დროსაც მას გასროლილი ტყვია მოხვდა.
რაც შეეხება დაკავებულს, ის კლინიკაშია გადაყვანილი, ვინაიდან, როგორც შინაგან საქმეთა სამინისტრო აცხადებს, მან დაკავებისას დაზიანება მიიღო, რადგან უწყების ცნობით, სამართალდამცველებს შეიარაღებული წინააღმდეგობა გაუწია.
იხილეთ ასევე:
- რა არის ცნობილი ვერაზე დაჭრის ფაქტზე დაკავებული ნიკა კაპანაძის შესახებ?
- "გაუფრთხილებია ბავშვები, ნუ იცინითო, გამოიტანა იარაღი და ცეცხლი გაუხსნა... ამათ დაძრეს მანქანა და..." - თბილისის ცენტრში მომხდარი დანაშაულის ახალი დეტალები