"უმძიმეს მდგომარეობაში შემოიყვანეს ბიჭი, რომელსაც მარჯვენა ზედა კიდურის სრული ამპუტაცია ჰქონდა" - რას ამბობს ექიმი ზესტაფონი-ქუთაისის გზაზე მომხდარი ავარიის შედეგად დაშავებულებზე?

ზესტაფონი-ქუთაისის გზაზე მომხდარი ავტოსაგზაო შემთხვევის შედეგად 13 ადამიანი დაშავდა.

• ისინი სასწრაფო სამედიცინო დახმარების ჯგუფებმა კლინიკებში გადაიყვანეს და მათ შესაბამისი სამედიცინო დახმარება უტარდებათ.

ავტოსაგზაო შემთხვევის შედეგად დაშავებულები ზესტაფონის ორ სამედიცინო დაწესებულებაში - "ფერომედსა" და "ჯეო ჰოსპიტალსში" გადაიყვანეს.

"უმძიმეს მდგომარეობაში შემოიყვანეს ახალგაზრდა ბიჭი, რომელსაც მარჯვენა ზედა კიდურის სრული ამპუტაცია ჰქონდა, იდაყვის სახსარში. ოპერაცია წარმატებით ჩატარდა, პაციენტი რეანიმაციულ განყოფილებაშია გადმოყვანილი.

• დანარჩენი ხუთი პაციენტიდან, რომლებიც როგორც ვიცი, უკრაინელები არიან, ახალგაზრდა მამაკაცს და ქალბატონს წელის არეში აქვთ წელის მალების განივი მორჩების მოტეხილობა. ერთ ქალბატონს აქვს მხრის ძვლის მოტეხილობა, ცდომის გარეშე, ორი ქალბატონი არის დაჟეჟილობებით", - განაცხადა "ფერომედის" რეანიმაცია-ანესთეზიის სამსახურის ხელმძღვანელმა, თამარ მახათაძემ "რუსთავი 2"-თან საუბრისას.

არსებული ინფორმაციით, ტურისტები თბილისიდან დასავლეთის მიმართულებით მიემგზავრებოდნენ. შემთხვევა სოფელ არგვეთასთან რამდენიმე საათის წინ მოხდა. სამგზავრო ავტობუსი გზიდან გადავარდა.

მომხდართან დაკავშირებით გამოძიება საქართველოს სისხლის სამართლის კოდექსის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესების დარღვევას გულისხმობს.