"თითქოს საომარ ზონაში ვართ" - საფრანგეთი უპრეცედენტოდ მასშტაბურ ხანძარს ებრძვის: რა ვითარებაა სტიქიის ზონაში?

სამხრეთ-დასავლეთ საფრანგეთში, ჟირონდის რეგიონში, მასშტაბური ტყის ხანძარი მძვინვარებს, რომელმაც უკვე ათიათასობით ჰექტარი გაანადგურა და 250 ათასზე მეტი ადამიანის ევაკუაცია გამოიწვია. ცეცხლი იმდენად ინტენსიურია, რომ სპეციალისტების თქმით, ის საკუთარ ამინდს ქმნის - იქმნება ე.წ. ცეცხლის ღრუბელი, რომელსაც ძლიერი ქარისა და ელვის წარმოქმნა და ხანძრის კიდევ უფრო გავრცელება შეუძლია.

• სტიქიის წინააღმდეგ ბრძოლაში ჩართულია დაახლოებით 2500 მეხანძრე, 1500 სამხედრო და 1200 პოლიციელი. ადგილობრივებს დახმარებას უწევენ მოხალისეებიც - მათ შორის ფერმერები, რომლებიც ტრაქტორებით წყლის ცისტერნებს გადააადგილებენ და მაშველებს ცეცხლის ჩაქრობაში ეხმარებიან.

• ხანძრის შედეგად დაღუპულია ორი ადამიანი, დაშავდა 75-ზე მეტი მეხანძრე. რამდენიმე დასახლებაში მცხოვრებლებს სახლების დატოვება მოუწიათ, ხოლო ასობით საცხოვრებელი სახლი განადგურდა. ხელისუფლება მოსახლეობას მოუწოდებს, თავი შეიკავონ დაზარალებულ რაიონებში გადაადგილებისგან.

სტიქიის მასშტაბს განსაკუთრებულად ართულებს მაღალი ტემპერატურა. საფრანგეთი ზაფხულის განმავლობაში უკვე მეოთხე სიცხის ტალღას ებრძვის, ზოგიერთ რეგიონში კი ტემპერატურა 38 გრადუსს აღწევს. სინოპტიკოსები აფრთხილებენ, რომ უახლოეს დღეებში სიცხე კიდევ გაძლიერდება და შესაძლოა, ტემპერატურამ 40 გრადუსს მიაღწიოს.

"თითქოს საომარ ზონაში ვართ", - ამბობენ ადგილობრივები.

ხანძრის საფრთხის წინაშეა ბორდოს ცნობილი ვენახებიც. რეგიონში, რომელიც მსოფლიოში ერთ-ერთი ყველაზე ცნობილი ღვინის მწარმოებელი ადგილია, მეღვინეები შიშობენ, რომ ცეცხლის კვამლმა შესაძლოა, მოსავალს სერიოზული ზიანი მიაყენოს. სპეციალისტების განმარტებით, ვაზი კვამლის ნაწილაკებს შთანთქავს, რაც შემდეგ ღვინის გემოსა და ხარისხზე აისახება.

• ტყის ხანძრებს ებრძვიან ესპანეთსა და იტალიაშიც.

ესპანეთის რამდენიმე რეგიონში ხანძრის გამო ათიათასობით ადამიანი იქნა ევაკუირებული. ხელისუფლების განცხადებით, ქვეყნის მასშტაბით უკვე ასობით ათასი ჰექტარია დამწვარი. განსაკუთრებით მძიმე ვითარებაა ავილას პროვინციაში.

იტალიაში კი სამხრეთ პულიის რეგიონში ასობით ტურისტისა და ადგილობრივის ევაკუაცია გახდა საჭირო, რადგან ცეცხლმა სანაპირო ზოლს მიაღწია. სიცილიაში რამდენიმე ასეული ხანძარი დაფიქსირდა.

მეცნიერები აღნიშნავენ, რომ მსგავსი ექსტრემალური სიცხეები და მასშტაბური ხანძრები კლიმატის ცვლილებასთან არის დაკავშირებული - გლობალური დათბობა ზრდის ხანგრძლივი გვალვების, მაღალი ტემპერატურისა და ტყის ხანძრების რისკს.

წყარო