სექსუალური ძალადობა, მუქარა, არასრულწლოვანთან სექსი - ჯარედ ლეტოს 4 ქალი სექსუალურ ძალადობაში სდებს ბრალს

ოსკარის მფლობელ მსახიობს, ჯარედ ლეტოს ოთხი ქალი სექსუალურ ძალადობაში ადანაშაულებს. მათი თქმით, სავარაუდო შემთხვევები მაშინ მოხდა, როდესაც ისინი არასრულწლოვნები იყვნენ.

• BBC-ის დოკუმენტურ ფილმში "Jared Leto: Hollywood's Dark Secret“, ერთ-ერთი ქალი აცხადებს, რომ 17 წლის ასაკში ლეტომ სასტუმროს სააბაზანოში მასზე სექსუალურად იძალადა. მეორე ამბობს, რომ 19 წლის ასაკში მსახიობი სასტუმროს ნომერში სექსუალური ძალადობით დაემუქრა. მესამე ქალი ამტკიცებს, რომ 17 წლის ასაკში ლეტოსთან სქესობრივი კავშირი ჰქონდა, რაც კალიფორნიის კანონმდებლობით შესაძლოა, არასრულწლოვნის გაუპატიურებად შეფასდეს.

მეოთხე ქალი კი ამბობს, რომ ლეტო მას 16 წლის ასაკში სექსუალური შინაარსის სატელეფონო ზარებითა და ურთიერთობის შეთავაზებებით ავიწროებდა.

ერთ-ერთი მათგანი იხსენებს, რომ 14 წლის ასაკში მუსიკალურ ფესტივალზე მსახიობმა მის მიმართ უხამსი კომენტარი გააკეთა და დაცვის თანამშრომელს კულისებში გაყვანაც სთხოვა.

დოკუმენტურ ფილმში საუბრობს ჯგუფის ორი ყოფილი თანამშრომელიც, რომლებიც აცხადებენ, რომ პერსონალს დისკომფორტს უქმნიდა ლეტოს ურთიერთობა ახალგაზრდა გოგონებთან, რომლებსაც მათი თქმით, ხშირად კულისებში ან მის საცხოვრებელში ეპატიჟებოდნენ.

BBC-მ ასევე გაავრცელა ინფორმაცია, რომ ერთ-ერთ ქალს მოგვიანებით კონფიდენციალურობის შეთანხმებაზე (NDA) ხელის მოწერა შესთავაზეს, რათა ლეტოსთან ურთიერთობაზე საჯაროდ არ ესაუბრა, თუმცა მან დოკუმენტზე ხელის მოწერაზე უარი თქვა.

ჯარედ ლეტო BBC-ის მიერ გამოქვეყნებულ ინფორმაციაზე ჯერჯერობით კომენტარს არ აკეთებს.

წყარო