"ენით აღუწერელი ტრაგედიაა, რომლის სრულად ახსნაც, შესაძლოა, ვერასდროს მოხერხდეს.“ - აშშ-ში კაცმა ცოლი და 6 შვილი მოკლა: ტრაგედიამდე ქალი პრობლემების შესახებ სოციალურ ქსელში წერდა

მიჩიგანის შტატში მომხდარი ოჯახური ტრაგედიის შემდეგ გაირკვა, რომ 39 წლის ამანდა "მენდი“ კაროლკევიჩი სოციალურ პლატფორმა Reddit-ზე მეუღლის ქცევაზე, ღალატსა და ოჯახურ პრობლემებზე წლების განმავლობაში ღიად წერდა.

• მედიის ინფორმაციით, 47 წლის კრისტოფერ კაროლკევიჩმა გასულ კვირას საკუთარ სახლში მეუღლე და მათი ექვსი შვილი მოკლა, შემდეგ კი სიცოცხლე თვითმკვლელობით დაასრულა. შემთხვევა 24 ივლისს, გრანდ ჰეივენში მოხდა. ბავშვები 5-დან 15 წლამდე ასაკის იყვნენ.

ტრაგედიის შემდეგ აღმოჩენილ Reddit-ის პოსტებში მენდი აღწერს, რომ ქორწინების განმავლობაში მეუღლესთან ურთიერთობაში არაერთი "საშიში ნიშანი“ არსებობდა. მისი თქმით, კრისტოფერი ხშირად იტყუებოდა, ზოგჯერ კი ფიზიკურ აგრესიასაც ავლენდა.

ქალი ასევე ამტკიცებდა, რომ ქმარს სამსახურში სტაჟიორთან რომანი ჰქონდა. ღალატის მსხვერპლთა ფორუმზე გამოქვეყნებულ პოსტებში ის წერდა, რომ წლების განმავლობაში ცდილობდა ოჯახის შენარჩუნებას, თუმცა საკუთარ თავს სულ უფრო დაუცველად გრძნობდა.

• ერთ-ერთ პოსტში ქალი წერდა, რომ ურთიერთობის დასრულებას შვილების გამო ვერ ბედავდა.

მისი თქმით, ერთ-ერთი კონფლიქტის დროს, როდესაც მეუღლის მორიგი ღალატის შესახებ შეიტყო, მათ შორის ფიზიკური დაპირისპირებაც მოხდა.

ოჯახის გარდაცვლილი წევრები პოლიციამ მას შემდეგ აღმოაჩინა, რაც მეზობლებმა სახლიდან ამომავალი თეთრი კვამლის შესახებ განაცხადეს. სამართალდამცავების ინფორმაციით, ოჯახის რამდენიმე წევრს ცეცხლსასროლი იარაღით მიყენებული ჭრილობები აღენიშნებოდა, თუმცა დეტალები არ დაუკონკრეტებიათ.

ადგილობრივი შერიფის, ერიკ დებურის განცხადებით, მომხდარი "ენით აღუწერელი ტრაგედიაა, რომლის სრულად ახსნაც, შესაძლოა, ვერასდროს მოხერხდეს.“

წყარო