"გეძებ ყველგან...გეძებ იმ გზებზე, სადაც ერთად გვივლია... ვინ ვარ აღარ ვიცი...რისთვის ვარ, ეგ ხომ საერთოდ ვერ გამიგია" - შოვის ტრაგედიისას დაღუპული დავით ბერიაშვილის დედა

შოვის ტრაგედიიდან დღეს 3 წელი გავიდა. მეწყრის ერთ-ერთი მსხვერპლი 25 წლის დავით ბერიაშვილია. მისი დედა, ია მერებაშვილი სოციალურ ქსელში წერს:

"25 წელი ვზრდიდით ერთმანეთს, 25 წელი გვიხაროდა და გვწყინდა ერთად. ერთად ვტიროდით და ვიცინოდით. ბევრს გაწვალებდი და გაბრაზებდი, როცა მეც პატარა ვიყავი.

მერე დავმეგობრდით და ვუფრთხილდებოდით ერთმანეთს.

მეგონა მთელი ცხოვრება ასე გაგრძელდებოდა და შენით უზომოდ ბედნიერი ვიქნებოდი. განგებას ყოველ დღე მადლობას ვუხდიდი იმისთვის, რომ მყავდი იმედად და საყრდენად.

მეამაყებოდა რომ შენი დედა მერქვა.ახლა კი გეძებ...გეძებ ყველგან...გეძებ სიჩუმეში. იმ გზებზე, სადაც ერთად გვივლია. შენს ხმას ვუსმენ, თითქოს სადღაც ისევ უნდა გავიგონო.და ვეძებ საკუთარ თავსაც. ვინ ვარ აღარ ვიცი...რისთვის ვარ, ეგ ხომ საერთოდ ვერ გამიგია....ჩემთვის შოვში გაიყინა დრო და სამყარო...", - წერს ია მერებაშვილი.

• შოვის ტრაგედიიდან 3 წელი გავიდა. 2023 წლის 3 აგვისტოს ჩამოწოლილ მეწყერს 33 ადამიანი ემსხვერპლა. ერთი არასრულწლოვანის ცხედარი ამ დრომდე ვერ იპოვეს.